Dan zawh rual loh Verstappen!

Dan zawh rual loh Verstappen!
Formula One world championship season thar bul tanna Bahrain lamah a chak zo chauh a, Inrinni Saudi Arabian Grand Prix-ah pawh Red Bull driver Max Verstappen bawk pakhatna ni lehin, intlansiak hmasa pahnihah hian Verstappen-a team-mate Sergio Perez pawh pahnihna ve ve niin, Red Bull ropui kum bawk ni leh dawnin a lang!
Jeddah Corniche Circuit, Jeddah, Saudi Arabia-a Inrinni race-ah Dutchman Verstappen chuan intlansiak thunun lehin, pathumna luahtu Ferrari driver Charles Leclerc chuan fastest lap ken tel point khat a rut tel.
Italian team Ferrari driver dang Oliver Bearman chu F1 race-a bul tan thei driver naupan lama a pathumna niin, Verstappen leh Lance Stroll-te hnung dawltu a ni.
Rawlthar kum 18 mi Bearman hian zai a tawh avanga chawl mek Spaniard Carlos Sainz hmunruak luahin Arab tlankawngah bul a tan a, F1 history-a intlansiak hmachhawn thei British driver naupangber a ni nghal a, record siam lama duhtawk mai loin race-ah pasarihna a luah a, point khat pawh hlawhchhuah harsatna Formula One-ah point ruk hum chungin driver standing-ah 10-na a luah mek.
Hnehna changtu Verstappen kha kumin intlansiak vawihnih awm tawhah a la chak ve ve a, kum liamta nen chhiarzawma a vawikaw chak zawnna ni tawhin, nikum September thla atang khan race-ah pakhatna a la ni chho zat zat a ni.
A team-mate Sergio Perez lah diau duh bik hek suh. Red Bull one-two kan hmu chho deuh reng a, Verstappen vang chauha pakhatna ni hlei thei lo mai mai niin a lang a, Formula 1 tlankawngah kum hnih dawn chu Red Bull driver pahnih hian lal an hrawt tling ta a ni.
Tun season-a intlansiak vawi 24 awm tura race three chu March 22-24 hian Albert Park, Melbourne lamah Australian Grand Prix hmangin an chhunzawm leh ang.