L Sailo
-- Advertisement --
Mizo mipui zinga mi tam ber hian ‘Dan zawma dik taka thiltihte hi mipuiin kan zo lo’ tih hi kan ngaihdan nghet a ni a. A taka kan ram kalphungin hetiang ngaihdan nei lo thei loa min siam tlat mai hi chu a vanduaithlak a, ram tan a pawi em em bawk a ni. Mahse kan tun dinhmunah hi chuan he ngaihdan hi a dikin a lang tlat si a ni! A dik nachhan chu, kan ramah mi lian, mi thiltithei, mi thiam, ram hruaitute leh an vua vangte’n an duh hun leh a theih hun hunah chuan dan lo leh a kawng awlsam zawnga thil an tih fo theih bik reng lai hian, mipui nawlpui, kut hnathawk leh rethei zawkte chuan dan ang leh dik taka thil lo tih bik zel hi, kan tlin reng bik Thin loh vang a ni ber!
Dan ang loa ram hruaitu, mi lian, thiltitheite leh an vua leh vangte’n awlsam taka thil an tih thinin nghawng tha lo pui pui, ram pawi lian khawih tham tham, Project bo, sum vbc sang tam riral, dan loa duhsak zawng hna pek … etc, media hrang hranga lo lang chuai chuai Thinte hi, mipui mimirte hian kan lo hriain kan lo hmu ve reng a. Hetih lai hian mipui mimir chu ram khua leh tui tha ni tur leh, dan zawma, dan anga thilti vek tura hrilh leh beisei kan ni reng thin thung. Kan ram hruaitute leh mi lian, mi thiamte anga, a awlsam zawnga thiltih ve duhin, dan zawm lote’n thil han ti ve dawn ila, Police leh NGO zuam leh ngam tawk kan lo ni si, anni ho man leh dodal kan tawk leh thin bawk si a. Chuvangin mipui mimirte tan chuan a awlsam leh short-cut zawngin, dan ang kher loa thil tih ve hi a theih thui lo a. Man chhuah loha vanneih chang chu awm ve bawk thin mahse, a khat a. Chuvangin mipui nawlpui hi chuan a tlangpuiin, rit tia zo lo hle chungin, ‘Dan zawma dik taka thiltihte hi mipuiin kan zo lo’ ti ti mah ila, dan kan zawm hram a ngai tho tho thin.
Hetih lai hian kan ram hruaitute’n a taka kan ram an hruai danin a zir bawk a, a theih hun apianga dan zawm loh hi, thil tenau-ah pawh ram nunphungah hian a lut nghet tawh khawp a. Kawnga motor tlan ni se, chhun pachangah pawh traffic point-ah traffic duty an awm loh hlek nikhua pawhin, wrong side-a traffic point tlan tlang theih chu chin Than a ni a. Khawi hmunah pawh miin min pui se la, dan ang taka min puih aiin, dan loa min han short-cut pui khan, a Tanpuitu tan pawh, Tanpuina dawngtu tan pawh, inchhuanna tham leh induhsakna tak tak anga ngaih a ni bik Thin a ni. Hetiang deuh hi thil lianah pawh, thil te-ah pawh, kan nunphung a ni tawh a. Chutiang tak chuan kan ram inkaih-hruaina hnuaiah hian dan ang loa thiltih theih hi, a chung ber atanga a hniam ber thlengin nuna bet a ni tawh a, chutih laia dan anga thil lo tih bik hi mipui nawlpui tan ‘kan zo lo’ tih mai loh theih pawh a ni lo reng a ni.
Dan zawm hi a harsat ber lai hun leh hmun chu, ‘dan zawm tur’ tih laia mi thenkhat, an duh huna dan zawm lo mai thei, man chhuah leh hrem tawh phah si lo, awlsamna leh hamthatna hmuhpui thei bawk an awm reng si laia, thenkhat dang ve thung tan, dan zawm reng a ngaih bik lai hi a ni. Tin, dan zawm loh kalphung hi khawtlang nuna a luh ngheh tawh phei chuan, dan zawm bik nih hi a harsain tha a na duh leh zual!
A nih, engtin nge kan Mizo puite ngei ram hmasawn leh changkang, US, Switzerland, Singapore, Australia … tih vela va zinte hian, chu’ng ram mipuite’n an ‘ram dan’ an ngaih pawimawhzia leh an zawm Thatzia hahipa an rawn sawi haw a, chu chu anmahni ngei pawhin Tha an tihzia leh a engthawl thlak an tihziate pawh an rawn sawi Thin si le? Engtin nge kha’ng ramah khan mipuite’n dan zawm kha harsa, thanat thlak an tih ve loh a, ‘kan zo lo’ pawh an tih ve ngai loh? Chutih ahnekin engtin nge, zo taka an nunphungah an seng luh a, tha leh nuam pawh an tih zawk pui theih si? A chhan chu, an ram thuneitu leh hruaitute khan, dan zawm loa thiltih an ching ve lo a, ram chhung mipui zawng zawng pawh dan zawm turin an kai-hruai a. Keini’n helaia kan ram hruaitute dan zawm loh thiltih kan entawn ang chiah hian, an ram hruaitute dan zawm thiltih leh an zirtirnate chu zawma, entawnah neiin an nunphungah an la lut thung a. Chutiang karah chuan, dan zawma thiltih chu an ram hruaitute leh, an ram mi lian, mi thiltithei leh mi thiamte hlei hleiin an uar a, dan chu ram kaih-hruai nan ber an hmang bawk a. Dan zawma thiltih chu, an ram mi lian mi te, a tua-te pawhin an tih a nih vangin, mipui nawlpui pawhin, a tira khirh deuh anga an hmuh pawh kha, a lo khirh lohzia an hre chhuak a, a hnu zelah phei chuan dan zawm loh kalphung aiin nasa takin dan zawm thiltih chu a lo Tha zawk tih an hmu chhuak ta bawk a. Tichuan dan zawm kalphung hi anmahni mimal tin bakah, an ram an hnam tih-hmasawn a, tih-ropuina hman rua berah an hmang ta zawk a ni. Tunah hian, keini ram anga ‘dan zawm loh’ kalphung hi an ramah apply leh tum ta se, mipuite zawk khu a duh lotu leh dodaltu lian ber an ni zawk ang. Tichuan ‘ram changkang leh ropuiah chuan, ‘dan an zawm Tha nasa’ zel ni loin, ‘Dan zawm Thatna ram apiang an changkangin an ropui’ zel Thin a lo ni!
Dan kan tih hian, tam takin a nih phung hi an man dik tawk Thin lo a. Intihbuai leh thu inchuh a awm nikhua chauha mi khirh bik thenkhatte leh, Police, dan hre mi leh Court lamin an hman tur bik emaw an ti Thin! Hei hi a dik lo! Dan hi chu kan ram pum inrelbawl dan tur leh kalphung tur inziahna a nih bakah, kan ni tin nunphung thunun tura siam leh hman tur an ni zawk a. Chumi zingah chuan intihbuai leh innghirngho, thu inchuh a awm nikhuaa hman tur hi chu tlem a tel ve chauh zawk a ni.
Chutianga dan hi ram pum kalphung leh kan ni tin nun thununtu atana hman tur a nih avang hian, mi Thenkhat lakah chauh hman emaw, Thenkhatin an duh hun huna an hman loh theih bik emaw a nih hian, dan hian nghawng Tha a nei thei ngai lo a, ram chhungah a Thena ni sa, a Thena ruah sur thlentu mai a ni Thin. Chuvangin kan ram hi Democratic republic ram, dan rorelna hnuaia awm, dan chu ram kal siamtu leh a chhunga ram mipuite nun pui tura duan a nih rau chuan, dan hi ram pumah inang tlanga mi te ber aTanga mi lian ber lakah, tumah hlahthlem awm loa inang tlanga hman tur a ni hrim hrim a. Chutiang tur chuan ram chhung mi Thenkhat Thahnemngai zualte hmalakna mai ni lo, ram pum kai-hruaitu kan Minister-te’n hma an hruai a, anni hian ram mipui entawn tur tling khawpa ram dan zawma ram kaihhruai thil engkim an tih a, ram mipuite pawh chuti zawnga an rilru hmin a, chu lama an nunphung pawh kaih-hruai a ngai a ni. Chutianga ram dan hi kan ram hruaitute hmalakna atanga ram kalsiam leh mipui nunphung innghahna atan kan hman theih hnu erawh chuan, mitin, a lian ber atanga a te ber thlenga kan zawm leh thiltih phunga kan neih a nih tawh dawn avangin tumahin dan zawma thil dik tih chu, thanat thlak ti leh zo lo kan awm thei tawh lo ang. Nakin zelah, kan ram kalsiam atan leh kan khawtlang nun, chhungkua leh mimal nun thlenga dan hman hi a lo that zia kan hriat tik-ah phei chuan, dan zawm kalphung hi, kan thlah phal tawh ngai lo zawk ang.
Hetia ram puma inang tlanga ram dan hman vek hi, mi tam tak, ram dan hnuaichhiah zawnga lo nung Thangte chuan an huphurh ang a. Tin, mipui nawlpui ‘in tan ram dan zawm chu a khirh lutuk ang, in zo lo ang’ ti zawnga zirtirna lo dawng Thinte pawhin, ‘thuneitute’n ram dan zawm vek ngai loa min hlahthlem a, min ngaih-hnathiam hram hram chung pawhin heti hi kan nia, dik takin dan zawm dawn ta ila, kan zo dawn hauh lo’ ti rilru ho-in, an huphurh bawk ang a. Mahse hei hi huphurh tur chi hauh a ni tawh dawn lo a. Dan zawm a harsat lai ber, mi lian leh mi thiltitheite’n an duh duha dan an zawm loh thin lai pawha lo zawm thei tawh Thin an ni a. Mipui nawlpuite phei chu zawm loa a taka hlahthlem an nih tum hi a tlem em em zawk a, thingtlang kut hnathawktu dik takte phei chu, dan zawm loh hlahthlem zar hi an zo pha ve ngai reng reng thin lo zawk a ni. A nihna takah chuan, hetianga dan zawm a harsat ber lai pawha dan zawm thei ngat ho hi chu, kan ramah dan zawm hi ram dang anga mitin chin, a te ber atang a lian ber thlenga kan chin ni ve ta se, tuna ‘dan zawma thil dik tak tih hi mipuiin kan zo lo’ tih ngaihdan neitute hlei hlei hi dan zawm nuam ti tur leh dan zawm thlah phal lo tur an ni ngei ang.
Tichuan kan ram hi mipui beisei thleng phain hmasawn-a, changkang ve tura kan duh chuan, kan mi thlan, kan ram hruaitu dinhmuna dingte hi, ram dan kengkawha ram kai-hruai tur leh, mipuite pawh ram dan zawm zawnga nunphung siam tur zawnga an rilru hmin a, kai-hruai turin nawr ila. Chuta kan hlawhtlin hunah chuan tu-mah ‘Dan zawma thil dik tih hi mipuiin kan zo lo’ ti hi kan awm tawh lo ang a, dan zawma thil tih chu, hlahthlem leh ngaihhnathiam awm loa a lian ber aTanga a te ber kalphung a nih tawh dawn avangin, a lo That zia, hmasawnna hnar a lo nih zia hmuchhuakin kan thlah phal tawh ngai lo zawk ang! Hei hi khawvel ram ropuite an intih-hmasawn theihna hnar a lo ni ang hian, keini pawhin kan intih-hmasawn pui theih lohna tur a awm lo. Ram pawi lian pui pui khawih tham thil tha lo zawng zawng siamtu chu dan zawm loh atanga intan an ni tih hria ila, ram hmasawnna leh ram ropui siamtu chu, ram pum hi dan zawma kaihhruai aTangin a ni tih i hre bawk ang u.