Danpuia enkawl bik kan nihna ang hi state dangin an nei ve lo – Zoramthanga

Danpuia enkawl bik kan nihna
ang hi state dangin an nei ve lo
– Zoramthanga
India danpuiah Mizoram-in enkawl bikna article kan neih ang chu state dangin an nei ve loa, hei hi India sawrkarin min chhuh dawn a nih chuan an hnena MNF-in a pek kha an rawn pek let a ngai tih MNF hruaitu Zoramthanga chuan a sawi.
March 1 kha MNF-in India laka zalenna a puanna ni – Mizo National Day champha a ni a, kumin a vawi 58-na a ni. He ni pual hian Mizo Hnam Runah hun hman niin, zalenna suala martar-te sunna hun hman nghal a ni.
MNF president Zoramthanga chuan zalenna puang a, India an kah chhan a sawi a. 1949 November 26-a India siamna danpui Preamble-ah Mizo kan tel ve loh vang leh excluded area kan nih avangin, India-a kan tel ve dawn chuan kan aiawhten an ngaihdan leh duh dan sawi ve duh kan nei, tia 1956 October 30-a Pu Laldenga leh khatihlaia India President Lal Bahadur Shastri leh Assam CM Chaliha ten Gauhati-a an sawihona bawhzui kawngah India-in kawng dang hawisanin, sipai tha chakna hmanga hnehchhuh leh awp beh luih min tum chhanna atan, loh theih lohin ram leh hnam humhimnan India kap ta kan ni, tiin a sawi.
Prime minister Jawahar Lal Nehru pawhin excluded area kan nih avanga tu ta mah kan nih loh thu leh British-in min enkawl laia min enkawl anga enkawl kan nih ve tur thu a sawi tih a sawi bawk.
“Buaina karah vawi tam inbia in, 1986-ah remna sual chhuah a ni a. Remna thuthlung duan a nih laia kan tanfung lian ber chu, ‘India siamnaa kan tel ve loh thu’ a la ni fan. India chuan UT kan nih mekna chu state-a hlankai leh, a bika enkawlna leh venhimna pek min tiam a, thubuai awm mek nuairal vek a, keini lamin kan ralthuam zawng zawng hlanin, midang kan puih thin titawpin, MNF-in dan kan hman mek pawh dahthat kan remti a ni,” a ti.
Chu inremna hrinchhuah chu, Constitution of India Article 371G a ni, tiin, enkawl bik kan nihna tur leh kan ram, hnam leh sakhua humhim tlat a nihna tur a lo piang ta tih Zoramthanga hian a sawi. “State dangten an neih ve hi chu khawngaih thilpek a ni a, hnam pasaltha thisen leh nunna tam tak inpekna avangin, zalenna famkim la nei rih lo mah ila, vawiin kan dinhmun hi min chhuh dawn a nih chuan, kan pek ve kha India hian min pek let a ngai dawn a ni,” a ti.
Art 371G kan neih bakah Mizoram sawrkar kutah kan sakhaw humhimna pawh awm ta tih sawiin, political party dang 35 chuang an ral tawh laiin, MNF-in ‘Pathian leh kan ram tan’ tih thuthlung an vawn tlat avangin, vawiin thlengin kum 64 chhung humhim an ni a, Zorama party lian ber zingah a la din tir reng tih a sawi a ni.