Dar 4 thlenga vote tla 76.53% Boruak duhawm lo a awm lo

MLA inthlanpui neih mekah November 7 tlai dar 4.00 thlenga Mizoram puma vote tla chu za zelah 76.53 a ni a. Hemi hnua vote thlak mek a la awm a, vote tla zat hi danglam tura ngaih sa a ni.Inthlanah hian boruak duhawm lo thleng a awm thu dawn a ni lo a. Inthlan muanawm tak nia sawi a ni.
Chief electoral officer Madhup Vyas chuan state pumah tluang taka vote thlak a ni chu lawmawm a tih thu a sawi a. Mizoram inthlan chu chhiatna liantham thleng leh buaina tel loin tluang taka zawhfel a ni, tiin, tun dinhmunah vote thlak zawng zawng zat hriat theih chiah la ni lo mah se, hun reiloteah hriat theih a nih a beisei tih a sawi.
Inthlan buatsaih chhung zawngin tlawmngai pawl hrang hrang leh Mizoram People’s Forum nena thawhpuinaah lawmawm a tih thu CEO hian sawiin, vote thlak zawng zawng chungah lawmthu a sawi a ni.
Inthlanna dik, felfai leh langtlang siam a nih theih nan polling booth-a chetvelna, webcasting hmangin uluk taka vilin, polling station awm zat 1276 zinga zaa 53.25 ah webcasting hi hlawhtling taka kalpui a ni tih sawi a ni. Election Commission bituk zat zaa 50 aiin a tam a ni.
Kum 2018 ah khan inthlan ni – polling day bikah zaah 80.03 a tla a, postal ballot te nen zaah 81.61 tla in, tun tumah hian tlai dar 4.00 thlengin vote tla zaa 76.53 a ni a, vote thlak tura kal, polling area-a lut hman engemawzat an awm avangin vote tlak dan hriat a har phah tih thu dawn a ni a. Vote tlak dan pawh hi a danglam leh viau dawn nia rin a ni.