Darkar 24 chhunga mi hmai chei tam record siam

Sierra Leone-a makeup artist pakhat chuan darkar 24 chhung mi hmai chei danglam tam thei ber record a siam. A hming chu Mary Yongai a ni a, nula kum 26 mi a ni a, darkar 24 chhungin mi hmai 111 a chei danglam hman a, kum 19 chhung record ding tawh a rawn khum ta a ni. A hmaa hetiang record chu Indonesian Martha Tilaar-i’n 2005-a a siam niin, darkar 24 chhung 96 a chei danglam hman.
Guinness World Records-in record siam thei tura zawm tur dan an duanah chuan mi hmai chei tih hian power inhnawih sak satliah ang mai mai a ni lo a, a hma aiin an lang nalh zawk ngei tur a ni a, concealer, foundation, blush/bronzer, eye shadow rawng chi hnih tal, eye liner, mascara, lipstick/lip gloss, lip liner te an hmang ngei ngei tur a ni a, a tawpah pressed/loose power tur a ni.
Record hi Sierra Leone khawpui Freetown-ah Mary hian siamin, mipuiin an thlir thup a, a record siamnaah hian an ram hruaitu leh milar te pawhin an telpuiin, an lo fuih phur ve reng a ni. Darkar 24 chhungin Mary hi minute 20 chiah a chawl a, engmah a ei lo va, soft drinks chiah a in.
Record a siam hnuah mipuiin an lawmpui a, Mary chuan, “Mi kha an tam lutuk a, kan chhuak tur pawh ka chau deuh bawk nen nikhawhreloin kan awm hman thelh a ni. Mahse, hetiang record ka siam thei hi lawmawm ka ti takzet a ni,” a ti.
Mary chuan Guinness World Records siam tur hian a inbuatsaih nasa hle niin a sawi a, a laizawnte leh thiante chu model-ah hmangin kar tam tak record siam tum hian a lo inpuahchah tawh a, makeup tih ran dan te zirin, ama tawka a inenchhinnaah darkar 8 chhungin mi 48 a chei zo hman a, “Hei hian mahni inrintawkna min neih tir lehzual a, record ka siam theih ngei ka inring nghet hmiah tawh,” a ti a, record siam tuma a rilru a pekna chhan chu Nigerian chef Hilda Baci’n eirawng bawl rei record a siam chuan record siam ve duhna a neih tirta niin a sawi bawk.