Darkar 24 chhunga pull-up vawi 10,001 tiin record siam

American pa-fit zet mai Truett Hanes chuan darkar 24 chhunga pull-up tihnem thei ber record a siam. A hmain he record hi a lo siam tawh a, mahse, a record midangin an rawn khum avangin tunah record thar a rawn siam ve leh ta a ni.
Pull-up chu exercise lak dan hahthlak tak mai niin, chunglama bar khamah ke a lei rap lovin an ban pahnihin an uai a, an ban chu kiu-ah tithlepin an inpawt kâng a, an khabe bar kham chungah an dak chhuak a, chumi hnuah ban timarin an uaithla leh thin.
Truett Hanes hian 2023 khan darkar 24 chhunga pull-up vawi 8,100 tiin record a lo siam tawh a, mahse, a record hi ni khat vel chauh a ding hman tihah Australian Gary Llyod-a’n rawn khumin, Gary hian darkar 24 chhungin pull-up vawi 8,600 a rawn ti ve leh thung.
Tichuan, record siam leh ngei tumin kum hnih hnuah a rawn thawk chhuak leh ta a, tun tum chu darkar 24 chhunga pull-up vawi 10,001 tihmanin, record thar, khum harsa tak tur a rawn siam leh ta a ni.
Truett Hanes chuan, “Ka nihna ka zir chhuah chu, ka beidawng ve mai ngai lo a, ka tih tawh ka tawpsan mai mai lo. Eng emaw theihna danglam bik leh chak bikna thuruk ka nei lem lo a, thil hi awlsam taka ka puitlin hi a awm mang lo bawk. Mahse, beidawng mai lo tura tumruhna hi ka thilpek dawn ve chu a ni. Kum pawh vei se, ka tum chu ka puitlin hma chuan ka chawl ngai lo,” a ti.