Darthlalang

H.Lalroluahpuia

Kum 2011 Census atanga thlirin India ram mihring zawng zawng vaibelchhe 121 atanga 97 (78.9%) hi Hindu an ni a. India rama sakhaw lian ber pathumna Kristiante hi maktaduai 26 (2.3%) vel chauh kan ni thung. Khawvel pumpuia Mizote hi Delhi a veng khat (eg. Vasant Kunj) pawh zat zo lo kan ni a.
Chutiang chuan he ram ropui taka mipui tam berte sakhua (worldview/culture) kan han khing ve ar ar ta thin a. Ram lak tur a tamzia lam ngaihtuah thleng pha leh si lovin chimral hlau tak chung siin inpumkhatna erawh chuan kan chhung lam leh pawn lamah te pawh ni sela hmun a chan lohzia kan lan chhuahtir chiang hle thung.
Kristian ral (nek chep) nge kan hlauha Mizo bo hi ni ta ang le… Kristianna chu Isuaah engkim a inbawr khawm vek a, a neitu pawh a ni. Kan rin ang lek(?), kan ti dawn nge, kan venthawn ang chauha dawrawm a ni lovang. Mizo erawh hi chuan a kungpui Isua a hransan hun hun chu a tlukchhiat hun tur a ni thung dawn a. Chu Isua chu keimahni leh keimahni avanga Amah la ring ve leh tur zawng zawngte nen chena kan inpumkhatna tur atana tawngtaitu, kan Puithiam Lalber kha a ni. A zahawm asin.
Mizo Kristian ten fiahna hrang hrang kan paltlang thin a. Hnehtu Isua zar zo zel lo chu ni ila, kan chan hi a chau thin hle ang.
Tunah pawh darthlalang tha mi, Pathiannia vote chhiar avanga inenfiahna tur kan hmachhawn a, a liam mek lai hian, a dem tur lam kan hriat ang huin kan harh chhuahna tur lamin keimahniah hmun a chang ve thei meuh lo.
Pathian ram ni lo, pawl ram avanga kan buaina te leh Isua rilru kan tihnat fo thinna te lam hian keimahni hi min hliam ve tawh zawk sela, kan Puithiam Lalber tawngtai chhanna chang tura kan harh pawh a hun ta hle mai…
Mizo Kristiante zinga rorelna chang tur pawhin kan sakhua ber(?) – Kohhran lian ber tihna tel lo chuan a harsa chho mek a, MPF thuawih thei nih pawh kan ram dan bu zawm aia pawimawh ta zawk nia a lan mekna hmun atang hian India han hmuh fiah hi harsa viau tur a ni lo.
Tu party pawh ni sela, India ram mipui tam berte ngainat leh ngaihsan, innghahna – Hindutva aia mipui hneh thehna tur thil dang, hmanraw tha zawk a awm thei rih mai dawn lova. Indem hman a ni lo tluk zetin indemna hian rah tha min chhuahsak hek lovang.
Darthlalangah inen ila, inpumkhata Isua chibai buktute kan ni em tih hi fiah takin hmuh i tum thar theuh ang u hmiang.
Kan tawngtaina chhangtu Pathian hnen atanga kan Puithiam Lalber dilna – INPUMKHATNA hmuh hlan kan nghakhlel viau hlawmin ka ring a. I harh mawlh teh ang u… Harhna tha mi kan ngai a ni ang em? Ngaihtuah a ngai e…