David-a nuin a fapa tan beih zel a tum
-- Advertisement --
– Zodin Sanga
Aizawl, Dec 22: Airfield Veng VDP/Kumpuan Committee ten nasa taka an dawp avanga boral ta nia sawi David Lalmuanpuia (31) nu Nunthangmawii chuan a fapain rorelna dik (justice) a hmuh theihna turin a tawp thlenga a beih zel tur thu a sawi.
“Mirethei kan ni a, ka hupna atan sum tam tak pawhin min thlem se la, thudik chu ka din pui zel ang. Belh chhah emaw paih emaw awm loin ka fapa chunga thil thlen dan dik tak hi ka sawi zel dawn a ni,” tiin Pathianni (December 23) khan an ina amah kawmtu chanchinbu mi a hrilh.
Social media-a tarlan tawh angin David-a hi December 18 zan dar 8 vel khan Airfield Veng-a Presbyterian bialtu pastor quarters rawk chungchangah a thianpa nen VDP hian an la a. A nuin a sawi danin, zan dar 8 vel atanga an dawp tan kha zanlai thlengin an dawp.
“An vuakna na a ti tawh lutuk khan ka ruk a ni e, a ti a. A dahna an zawt a, sawi tur a hre leh si lo. An vuak chhunzawm leh a. Na a ti lutuk a, ‘Ka nu min chhan rawh’ tiin min rawn au a, ka tlan lut ringawt a, ban ka phar a, keimah pawh chu min vaw tel hial a ni,” a ti.
“Rei tak an vuak hnuah chuan ka mangang lutuk a, police phone number ka neih kha ka dial ta ringawt a, an lo hmang tawh lo a ni ang, tumahin an la si lo a. Tih ngaihna dang ka hre tawh si lo. Pastor quarters-ah ka tlan lut ta ringawt a. Pastor hnenah chuan ngaihdam ka dil a. A pawisa ruk nia an sawi pawh hi kan rul leh mai ang, ka ti hial a. Pastor chuan pawisa kha kan mamawh ber a ni lo, a ti a. VDP hotute phone saka vaw tawh lo tura hrilh mai tura ka ngen pawhin,
khawtlang hnenah a awm tawh avanga inrawlh a rem loh thuin min chhang a ni,” a ti.
Pastor quarters rawk hi December 18 zan inkhawm laia thil thleng a ni a, hetih lai hian David-a hi inah a awm niin an sawi bawk. David-a nu erawh Aizawl a kal avangin inah a awm lo thung.
David-a tunu (a farnu fa) sawi danin a putea nen hian inah an awm a.
“A chhuah chu a va chhuak zawk thin a, mahse reiloteah a lo lut leh a, pastor quarters va rawk a rawn let lehna hman a awm lo hrim hrim” a ti. An in atanga pastor quarters hi km khat vela hla a ni.
Pastor quarters tukverh atanga zuangthla lai mita hmutu an awm nia sawi a ni a. David-a hi bike accident avanga ngal ruh tliak, a ngala thir phum a ni a, chutianga sang tukverh atanga zuang thla a, him dam taka chhuak thei niin a chhungte hian an ngai lo.
Pastor quarters hi tukverh te reuh te, lei atanga sak tak atang luh ruk a ni a. An steel almirah kar chhiain Rs 26,000 ruk chhuah a ni. Rukru (te) hian pawisa an zawnna lamah bungrua an hai darh nasa hle a, a lo berah minute 20 vel tal hun an hman rin a ni.
Pastor hian VDP hnenah a report a. Rinhlelh a neih thu a sawi lem lo thung. VDP hian an veng chhunga ruihhlo ti thin na na na chu rinhlelh thil thuah an la mai niin a lang. Tun hma pawhin David-a hian VDP man leh vuak chu a lo tuar ve fo tawh a ni awm e.
“Ka fapa kha a fel lo a, zep tur a awm lo. VDP ho huat pawh a hlawh ang. Pastor quarters a rawk lo tih erawh chu ka chiang. Ani ke na lehnghal tan khatiang tuverh sang tak atanga luh ruk ngaihna a awm lo a, zuan thlak phei chu a theih loh hulhual. Pastor quarters rawk a nih hun lai khan inah a awm bawk a ni” David-a Nu hian a ti.
David-a kha zanlai pelh hnuah VDP room atangin nikhaw hre loin zawn chhuah a ni a. Motor-ah an zawn lut a ni.
“Engtin nge in tih dawn” ka tih pawhin tumahin min chhang lo. An zinga pakhat chuan motor chhunga ka fapa bulah chuan thu turin min hrilh a, Vid-a tiin ka ko a, min chhang tur a awm lo,” Nunthangmawii hian a ti.
Damdawi inah hian thi sain kan lut nia a hriat thu a sawi bawk.
Hospital lam chuan nikhaw hreloa zawn luh (brought unconscious) angin an report thung a. David-a hi Greenwood Hospital chuan December 19 zing dar 1:20 a zawn luh angin an record a, zing dar 1.35-ah a thi nia report a ni.
David-a chhungte’n FIR an theh luh bawhzuiin Bawgkawn police hian case an register tawh a. Section 105/3(5) BNS hnuaiah thubuai (culpable homicide not amounting to murder) an ziak lut a. VDP member mi pahnih Zonunsanga leh Lalhmangaihzuala te chu man niin jail-ah thawn an ni tawh a ni.
He thil thleng leh nunna chan David-a nu thusawi hi social media lama a darh hnuah pastor hian social media lamah dem a hlawh nasa hle a. Inrinni zan atang khan nasa taka troll zui a ni.
Rawk tawktu pastor Rev R Lalhmuchianga chuan David-nu in a puhna hi a dik vek lo tih sawi thung.
“Ka ngaihdam theih loh thu ka sawi lo reng reng. Ka ngaidam che u lawm, ka ti a. Amaherawh chu, khawtlang kuta ka hlan tawh avangin tih theih vak ka neih loh thu chu ka sawi ngei a. David-a nu min ngenna ang hian VDP hruaitute pawh ka call ngei alawm,” a ti.
A call log a en a, December 19 zing dar 12.29-ah a call thu a sawi.
“Ka call hnu hi chuan vuak pawh an vaw tawh lo reng a ni,” a ti.
David-a nu in pastor a hmuh hun nia a sawi erawh December 18 zan dar 10.00 vel a ni a, pastor-in “David-a nu a lo kal” a tih hun, zanlai dar 12 vel nen hi chuan a inang lo ta a ni.
Engpawh chu nise, pastor hian VDP hruaitute a call meuh hi chuan David-a hi nikhawhreloin a awm tawh niin a lang.
Youtube-a David-a nu thusawi anga tarlan, “Pastor te nupa hian ‘kan fate hi tan lo phawt mai ila’ an ti” tih pawh hi David-a nu nen titi phunglenga an sawi niin pastor nupui hian a sawi.
“Fa enkawl harsat zia chungchang titi phunglenga kan sawi a ni a, kan pa (pastor) phei chuan chutiang thu a sawi ve lo hrim hrim,” tiin pastor nupui hian a sawi.
A fapa thih hnu hian pastor hian tawngkam khat mahin a rawn be lem lo niin David-nu hian a sawi bawk.
“A ruang ni khan zingah a lo kal a, a haw dawnah ka darah a rawn khawih a, ka va haw phawt ange aw, a ti a, chubak engmah a sawi lo,” a ti.
A nu sawi danin David-a kha ruihhlo ti thin ni mah se, taima taka inhlawh thin a ni a, bawlhhlawh haiin a inhlawh thin a ni.
David-a thihna hian mite thinlung a khawih hle niin a lang a. Social media-ah a dawptu VDP bakah report-tu pastor pawhin dem a tawk nasa hle a ni.