Davis a chak zel

Davis a chak zel
Pathianni zing khan Las Vegas khawpuia T-Mobile Arena-ah inhnek ngaihven hlawh tak a awm a. Boxing-ah tlawm nei lova kaltluang pahnh; Gervonta Davis leh Ryan Garcia te an inhmachhawn a. Round sarihnaah knockout-a chakin Davis chuan Garcia chak tluang lai a tihtawpsak.
Tunlaia boxer tha pahnih Gervonta Davis leh Ryan Garcia te inhnek tur hian ngaihven a hlawh hle. Boxing ngainatute hmuhchak inhnek ngaihven hlawh tak hi hmuhnawm takin bul an tan a. Round khatnaah an inehtawkin, an inngam tawk hle. Round hnihnaah Garcia-a’n bul a tan tha zawk a, a tawp a khar chhe deuh zawk thung. Garcia hian a khingpui hnek tluk a tum luatah a che sual a, a khingpui hnek na tak vangin a tlu zauh. Rang takin tho leh bawk mah se a point a hniam phah tho thung.
Round thumnaah pawh an inhnehtawk zui leh viau a, chak zawk tur rin thiam a harsa hle. Inhnehtawk chho viau mah se round sarihnaah
thil zawng zawng a danglam ta vek thung. Round sarihnaah hian Davis hian na takin a khingpui Garcia a nawr a, a dul thuarah chiang zeta hneksakin a hnek tlu a. Inhnek zui tura Garcia a thawh theih loh vangin referee Thomas Taylor chuan inhnek a titawp a. Gervonta Davis chuan knockout hmangin
hnehna a chang zui ta a ni.
Inhnek hmuhnawm takah a phu ang ngeia hnehna chang Davis hian inhnek vawi 29 hmachhawn tawhin a la chak vek a. A hneh tawh mi 29 zingah 27 zet knockout in a hneh. Davis laka tlawm ta Garcia kha inhnek vawi 24 a hmachhawn thlengin a chak vek a. Inhnek vawi 25 a hmachhawn tumin Davis lakah a tlawm ta a ni.