Dawi thiama puh chhungkuaa mi panga hal hlum

Dawi thiama puh chhungkuaa mi panga hal hlum
Bihar-a Purnia district-a thingtlang khuaa chhungkaw pakhata mi panga chu ‘dawi thiam’ nia puhna avangin hal hlum an ni.
Pathianni zan tlai tawh tak, mi tam zawk an mut hnuah Tetgama khuaah mi 50 rual velin Sita Devi-i chu kai thovin ‘dawi hmang’ angin an puh a. Devi-i fapa kum 16 mi, Sonu Kumar-a chuan an ina awmte chu mipui hian pawt chhuakin kut an thlak zui nghal a, amah hi tlanchhiain an chhungte hnenah a tawm a, a him hlauh niin a insawi.
“Khuaa mite hi kan inah lo kal khawmin tiang an rawn keng a, min vaw pawp pawp a, ka nu chu ‘dawi thiam’ tiin an ko va. Mi panga kut an thlak a, ka nu leh pa bakah ka unaupa leh kan mo pawh an tel a. Kut thlak ve lotu khaw mite chuan dan an tum reng reng lo ani,” tiin Kumar-a hian thuthar lakhawmtute hnenah a sawi.
A nu leh pa telin a chhungte panga chu mipui hian an hal a, an ruang chu tuiah an paih niin a sawi.
Purnia Sub-Divisional Police officer Pankaj Kumar Sharma chuan Kumar-a hian Thawhtanni khan police hnenah thubuai a theh lut tih a sawi.
“Sonu Kumar-a hian a chhungte chu miin kut thlak leh dawi thil ti thina puh avanga hal hlum angin a sawi a, an ruangte pawh an paih niin a sawi a. Ruangte hi kan hmu leh vek tawh bawk,” a ti.
Hetianga chhungkaw khat beih an nih chhan hi an khuaa cheng pakhat, Ramdev Oraon-a’n tun hnai lawkah a fapate zinga pakhat a chân a, pakhat na takin a damlo bawk a. An khuaa mite chuan Devi-i thil tih vangah an puh atanga intan niin Sharma chuan a sawi.
“Ramdev Oraon-a fapa pakhat hi ni thum kal ta khan a thi a, pakhat dang a damlo bawk a. Khaw mite chuan Sita Devi-i hian a dawi niin an ngai a, hei hi an chhungkaw laka an lungawi lohna leh hetianga an chet chhan hi a ni,” tiin police officer chuan a sawi.
Mi pahnih an man tawh tih a sawi a, “He thil thleng hi kan ngai pawimawh hle a, a inhnamhnawih chu tumah zuah kan nei dawn lo,” a ti.