Dr. C. Lalrampana
-- Advertisement --
A KAMKÊUNA
Kan thupui atang hi chuan ei tur tui deuh, nin theih loh khawpa tui, midang aia ei hnem bik thin sawina ni awm tak niin a lang. Mahse, ei leh in lam a ni lo, a sawia sawi lam chi a ni e. Dãwt hi ‘thudik lo; rintlak loh; innghahna tlak loh leh belhchian dawl lo; engmah lo mai’ tiin hrilhfiah ila a dik zawber mai awm e, Chutiang thu lawi lo leh finfiah tlak loh chu dãwt kan tih thin chu a ni. Dãwt hi chihrang hrang a awm thei, chungte chu: Dãwt ngialngan; dãwt muhlum; dawt vãr tihte a ni tlangpui. Kan Pathian pawh hian dãwt hi a duh lovin a haw hle a; Bible chang 166 vel zetah dãwt chungchang hi tarlan a ni. Dãwt sawi hmang, mi daw heh thu lawi lo hmanga bum hmangte hi Pathianin a haw takzet a ni. |hianho, pãwlho, chhungkua, khawtlang leh puipunna zingah pawh mi dawthei leh dãwt sawi hmang, dãwt sawi hrat, mi bum chingte chu tuman kan ngaisang thei lova, a ruka nuihzatbur bak engmah an hlawh thin lo.
TUNGE DÃWT HEH?
Inthlanpui kan hmachhawn apiangin political party hrang hrangte’n tlin an duh luat avangin an tih theih lo tur thleng thlengin mipui hnenah thutiam hrang hrang an tiam a, thlan tlin an han ni ta chenga an thutiam hlen ngei ngei tura an sawite chu an theihnghilh der leh fo thin. Hnam tlem zawk Bru leh Chakma chen tamna laiah phei chuan tangkawng manna khawl, chakai manna khawl pekte pawh an tiam thin nia sawite pawh a awm. Nikum 2023 MLA inthlan dawn leh kumin Lok Sabha inthlanpui May-July, 2024 dawn pawh khan an chin dan ngai bawkin political party tinte’n mipui hnenah eng eng emaw an tiam leh duah a nih kha! Abikin Mizoramin MLA inthlanpui kan neih apiangin political party tinte mawng vawm bã ang maiin an phu suau suau thin a. Amah Pu Hãwla sawi thin dan takah party tinte’n manifesto an inziah thatsiak a; sorkarna chang pawh ni se, a taka an tihhlawhtlin theih loh tur thleng thlengin mipui hip thei tur ang berin party manifesto, flagship programme dãwt leh thutak chawhpawlh ni ãwm tak tak an buatsaih a, an vawrh darh chuai chuai thin. Kum 115 liam ta May 12, 1907-a din, 1801 West End Ave, USA nitin chanchinbu ‘The Tennessean’ 2019 chhuaka columnist Buzz Thomas ziah dan chuan- “Khawvel mihringah hian Pathian hming lam reng chunga dãwt sawi hnem ber chu politician-te an ni” a ti hmiah mai! Hetiang a nih vang hian alawm, political party hi “milar, mi hming tha leh Pathian mi, sakhaw puithiamte inrawlhna tlãk a ni lo” an lo tih fona thin chu? Nikum inthlan dawnahte khan social media hrang hrangah politician-te dãwt sawi, ziak leh tawngka, video thlengin a inlãr leh sup sup mai a nih kha! A thenin- “that loh theih lohna bãwm & old pension scheme” an ti. A thenin- “Kalphung thar & val upa council” etc. an ti. A thenin- “Pathian leh kan ram tan, kawngpui tha, SEDP etc” ti mah se, an insawi ang hi an ni tak tak hauh si lo. Dãwt insawi huai siak ringawt hi ram hmasãwnna thlentu a ni si lo.
DAWT HAL INKHAWM
July 19, 2024 chhun khan MNYF chuan Vanapa hall kawtah pungkhawmin ZPM party hruaitute dâwt sawi lawrkhawm 100 zet chu an halral a nih kha! A haltute ngei pawh khan inthlan dawn apiangin dâwt an sawi ve tho niin a lang. Entir nan: kawng chhawng; traffic jam free city; Switzerland of the east; chakai farm; in tinah SEDP Rs. 3,00,000 theuh kan sem ang etc. Chutiang zelin congress party leh party dang pawhin dâwt tam tak an sawi tawh niin a hriat theih. ZPM thalai pawhin MNF Party dâwt sawi hâl tur an nei ve teuh tho mai! ‘The Tennessean’ 2019 chhuaka columnist Buzz Thomas thuziah – “Khawvel mihringah hian Pathian hming lam reng chunga dãwt sawi hnem ber chu politician-te an ni” a lo tih khi a dikzia tilangtu lek fang an ni awm e. Heng dâwt sawi chingte hi zing tawngtai inkhawma kal thin, Sande sikul zirtirtu; kohhran upa leh kohhran hruaitu; inkhawm thulh ngai lo; khawtlang hruaitu leh rawngbawltu; NGO hrang hranga hruaitute an ni deuh vek awm e. Mahse, Pathian huat zawng ber dãwt sawi an tim chuang hauh si lo a ni ngei ang. Dâwt sawi inhalsiak tur an nei tawn tlat mai niin a lang. Tu party mah fihlim an awm lo. ZPM party hotute dâwt sawi lakkhawm 100-te kha ngun taka thlir chuan sawi âwm lem loh leh sawi kher ngai lote leh thu holam tak takte pawh a tel nawk niin a lang. A taka tih theih tih leh si lohte leh tihhlawhtlin theih si lohte chenin a awm niin a lang. Kan politician-te hian engvangin nge dâwt hmanga mipui min bum kher thin le? Dâwt tel lovin inthlan hi an hmachhawn ngam lo em ni? Dâwt ngaina misualte’n hun tawpah thiam loh an chang ang tih an hre reng lo vem ni? Dâwt hâl inkhawm hi buatsaih ziah tur ni ta se hna kan thawk hman ngût dawn em ni? Dãwt inhâlsiak rêng rêngin hun hman a ngai ang a, ram development an khawih hman lul lovang?
A TLÃNGKAWMNA
Tun hma atang tawhin inthlan dawn apiangin milãr, mi hausa, mi fel leh fing, sakhaw rawngbawltu, Officer pensioners, Doctors etc. ram hmangaihtu, a taka ram siam that tumtu mi engemawzat political party hrang hrangah zuanglutin an bel tawh thin a; inthlanah candidate-te niin thlan tlin an han ni ve tak hlawm a; political party an belh hmaa an tum ang kha engmah an tihlawhtling leh tak tak thei thin lo. A thente phei chu political party dang dangah an zuang lãwr a, an tlan tãu a; an kual an kual a, dãwt lah an heh tual tual a, a hmaa lo awmsate aimahin an phakarin an verther a; lungawina famkim hmu chuang hek lo, an rinna a tlahniam a; Pathian theihnghilhin zû leh ruih theih thil leh hmeichhiat mipat hman sualna khurahte an tla lut a; vanram chang tur kha Gehenna meipui lamtluang zawhin an vãk liam leh mai thin. Heng kan milar, mi hming tha, talent tha tak tak neite hian Mizoram leh hnam an hmangaih takzeta ram siam that an duh takzet a nih chuan political party-ah zuang lut lovin independent-a ding turin huaisen takin an hmathlir leh innghahna (vision & principle) theuhte chu Zoram pumah tlangaupui ngam zawk se, Pathian rinchhanin huaisen takin pen chhuak mai se Pathian pawhin ram leh hnam an hmangaihna hi a tihhlawhtlinsak ngei a rinawm zawk. Political Party an belh tawh chuan inkaihhruaina dan leh dun, party thiltum an nei sa vek a, an mimal hmathlirna leh principle an dah lal thei tawh lova pawl dan leh dunin a phuar bet tlat a, dan an bawh chhiat chuan pawlin a thunun a ngai a; an bawhchhiat dan azirin primary member an nihna thlenga hlihsak theih a ni a; chuvangin, MLA-ah thlan tlin lo ni mial pawh ni se, an tum angin an kal thei lo tih a chiangsa a, a tawpah Gehena meipui lamtluang zawhin Zoram mipuite hian kan vai liam leh mai ang tih a hlauhawm hlel lo. Chuvangin, inthlan vote thlãk hun hmaa mizo chhul chhuak, mi hmingtha leh ram siamthat tum tak tak an la awm a nih chuan political party-ah zuang lut lovin Pathian rinchhanin huaisen takin independent candidate hma chhawn ngam turin inbuatsaih ngam thin ila, tichuan, dãwt an heh lo ngam ang a; an hmathlir leh innghahna bulpui a takin an pãrchhuahpui thei ngei ang. Chutianga a taka ram hmangaiha, mahni inpumpeka pênchhuak ngam apiangte chu mipuite hian dãwt hehho aiin ngaisang zawk ila; hetianga penchhuak ngam, mi huaisen hi kat nuk zawk se, kan Zoram hian hma a sawn phah zawk ngei ang. Dâwt hãl tur nei theuh theuh tunge lem chuang le? Chuvangin, kan Zoram politician-te hi inngaihtuah nawn mawlh teh se.