Dawt thu thehdarh

Saiha-a Meitei dawr pakhat hmeichhe NGO-ten an khar luih tir niawma darh chu thudiklo tih finfiah a ni.
Siaha Vaihpi-a puanthuitu, ‘Meitei Dress’ dawr khar chungchangah district bawrhsap Lalhmunsanga Hnamte chuan a hmunah magistrate tirin chhuichian a ni a. Meitei Dress neitute hnen atanga thudawn danin, Mara hmeichhe pawl – Mara Chano Py (MChP) emaw Lai Women Association (LWA) emaw te vauna vanga dawr khar anga social media lama thudarh chu dawt a ni a, chawlhhahdam an duh vanga dawr khara Manipur lam pan an ni zawk tih magistrate hi an lo hrilh.
Social media lama thuchiang tawk lo leng vel awm thin chu Siaha bawrhsap chuan pawi a tih thu sawiin, Siaha district chu remna leh muanna awm tur leh mitin tan zalen taka chenna hmun a nih theihna’n hma lak zel a nih thu a sawi.