De Bruyne chawl leh dawn

Manchester City midfielder Kevin de Bruyne chu karliamta Zirtawpnia City-in league bul an tannaa Burnley an hneh tum khan Turf Moor-ah darkar chanve pawh khel tling zo loin a bai chhuak a, club thuchhuah chuan thla engngemawti chhung chawlh a ngaih tur thu leh zai hial pawh a tul mai thei tih an puang.
Kum 32 mi kaihza tha na endik result hi hriat a la ni chiah lo a, zai turin thutlukna an siam thawm pawh la awm chiah lo mah se City manager Pep Guardiola chuan ‘serious injury’ tiin a sawi.
De Bruyne hian kumin June thla Champions League final-a Inter Milan an hneh tum pawh khan hliam avangin khelmual a lo chhuahsan tawh bawk.
Belgium midfielder hian City pre-season match zawng zawng pawh kha a khel lo fai vek a, season khuhhawnna Community Shield-a Arsenal an ngam loh tum khan second-half substitute niin a lut a, harsatna nei loa season bul a tan theih tawh an beisei laiin a talbuai zui leh ta a ni.
Guardiola chuan De Bruyne inhliam chungchang sawiin, “Zai a tul dawn leh dawn loh kan la rel ang a, tuna kan sawi theih chin chu thla engngemawzat a chawl hrim hrim phawt dawn tih hi a ni. Ni reilote hnuah zai leh zai lohah thutlukna siam a ni dawn a, thla thum atanga thla li vel a chawlh a ngai ang,” a ti.
De Bruyne hian season liamtaa Treble champion an nihna kawngah Etihad club tan goal 10 thunin assist tum 31 a siamchhuak a, City chu Champions League, Premier League leh FA Cup-ah a champion-pui fai vek a ni.
City hian inhliam De Bruyne tel loin nizan khan Europa League winners Sevilla chu Athens khawpuia Super Cup-ah an hmachhawn.