Debate tura inchona bawk…

ZPM sawrkarin CBI hnena general consent a pek dan ZPM Legal department-in a sawifiahna chu tanchhan tak tak awm loa insawi thiam tumna a ni tiin, Congress senior vice president Lalnunmawia Chuaungo chuan public debate neihpui an hnial lo tih tunhnai khan a sawi chhuak a.
CBI hnena general consent pek chungchangah hian thu inchuh a awm mek a, a lehlamin tunhnaia criminal law thar hman a nih tak avanga general consent pek thar a ngaih thu leh, a hmaa general consent an lo pek tawh dan nen danglamna awm lo nia an sawi chu, Congress lam chuan a ‘danglam alawm’ an rawn ti a ni ber.
Hemi chungchangah hian Congress lam chuan, ZPM hian sawifiah ngial tum mah se, thudik lo mipui fah an tum avangin an hlawhchham a ni, an ti a. Central hnuaia thawk bakah Mizoram Lokayukta-in rawtna a siam phawt chuan, Mizoram sawrkar hnuaia thawk, state sawrkar phalna a hranpaa lak kher ngai loa chhui thei tura CBI hnena consent pekna gazette notification chhuah turin chief minister an ngen tih an sawi a, draft gazette notification pawh an thehlut nghal nghe nghe a. Central-a BJP sawrkarin central agency-te a hmansual thin dan thlir tel chungin, hetiang laka inveng tho in, mipui beisei angin a tih theih tih an ‘draft’-ah chuan an telh tih Congress chuan an sawi bawk a ni.
Congress lam thu leh hla atang hi chuan thil awmzia hi a chiang thawkhat viau niin a ngaih theih a. A lehlam hian thil awmzia diktak mipui hrilh hi an tihtur a nih piah lamah, hetiang thu ‘serious’ chiang taka hriatfiah hi mipui dikna leh chanvo a ni nghal a. Hei hi ngawihbopui mai tur chi niin a lang lo.
Kan hriat angin May thla thla laihawl velah khan SASCI sum chungchangah thu inchuh a awm deuh avangin ZPM lam chuan media hmaah ‘common platform’ hmanga sawihona neihpuiah MNF kha an lo cho tawh a. Kha thilah khan ZPM chuan ziak meuhvin MNF Legislature Party hnenah lehkha an thawn kha a ni a. MNF lam pawhin lo cho let vein, special session koh hial an lo phut let zawk a nih kha. Mahse, thawm kan hre zui leh ta lo.
Hetiang thu pawimawh leh serious hi debate hmanga a dik zawk zawn chhuah tum hi thil awmze nei vak lo niin a lang a, ‘mipui dawt hrilh’ anga inpuhna a nih chuan, debate-a incho kual vel lo hian ‘legal action’ a awm theihna tura hma lak mai hi a tul zawk a ni mai lo maw a tih theih awm e.