Debate vangin Joe Biden laka rinna tlahniam nasa hle

US President Joe Biden chaun Democrat donors te chu presidential election-ah Donald Trump a hneh theih ngei tur thu a hrilh. Presidential debate hmasa berah a chet chhiat em avangin Biden laka rinna hlohna a nasa tia sawi a ni thung.
Kum 81-a upa Biden chuan New York leh New Jersey-a fundraising event a thusawina a neihah CNN huaihawta Presidential Debate-a a performance chungchang a sawi a.
Biden chuan, “Ka tan zan tha a ni hauh lo va, Trump tan pawh an tha a ni chuang lo” tia sawiin, “He inthlanah hian ka chak dawn tih ka tiam a che u” tiin a sawi.
Biden chuan debate neih hmasak bera a chet that loh avanga hlauhthawnna awm chu a hriatthiam thu sawiin nasa zawkin ka bei dawn tiin a sawi bawk.
New Jersey Democratic governor Phil Murphy chuan fundraising evenrt ah hian Biden leh first lady te tawiawmin a tel a, “1,000% in kan thlawp tlat che” tiin a sawi a ni.
President thlanna neih hmaa deabte hmasa berah Biden chu che chhe hlea ngaih a ni a, zawhna pawh chhang tha mumal thei lova puh niin Democrats tam tak te pawhin inthlan lo awm turah candidate chi a ni em tia zawhna an neih thu sawi a ni bawk.
Democratic House Speaker hlui Nancy Pelosi pawhin debate a Biden chetdan chu ‘ropui lo’ tia sawiin communication director hlui Kate Bedingfield pawhin ‘duhthusam lo takzet’ tiin a sawi bawk.
Biden campaign team te pawhin debate ah an che beisei angin an che tha lo tih pawmin mahse presidential candidate turah midang ken a tum lo an ti nghal thung.
Campaign chairwoman Jeenifer O’Malley Dillon chuan debate hnuah internal polling ah voters te ngaihdan engmah sawhsawn a awm lo a ti thung a. “Media narratives uchuak takin poll ah min dah hniam tumkhatna tur a ni lo” tiin a sawi.
Presidet hlui Barack Obama, Biden nena inthian tha tak pawhin social media kaltlangin ‘debate-ah chet that loh zan a awm thin’ tiin a sawi a. “He inthlan hi mi pakhat mi pangngai te tana a damchhung beia hun hmang tawh leh mi pakhat amah chauh inngaihtuah inbeihna a ni” tiin Obama chuan a sawi.
Debate neih hnu lawkah Trump chuan amah thlawptute hnenah an debate-ah a chak zawk tia sawiin a campaign tana hnehna turu a ni tia sawi bawkin Biden chua ‘laktlak loh’ tiin a sawi a.
“Joe Biden harsatna hi a kum lam a ni lo” tiin kum 78-a upa Trump chuan a sawi a ni.
Biden performance chu politics thilah chauh loh pawh sawisel niin New York Times editorial meuh pawhin president nih leh a tum chu ‘inthapa inchawina pawi thei tak’ tiin a ziak lang a.
Democrats te chuan Biden hi ding chi a ni tawh lo tih an man a ngai a, a aiawh tur midang thlanna kalpui zui nghal zawk rawh se tiin a ziak lang bawk.
United States-a voters tam tak te chuan candidate pahnihah debate zawh tawh hnuah rilru pek har an tih thu an sawi thung a.
Democrat Lori Gregory chuan debate kha en harsa a thu sawiin ‘Hei hi em ni kan ramin a tih theih ang ber’ tia a inzawh thu a sawi bawk a.
Republican Crystal Myers-Barber pawhin deabte chu enhahthlak a tih thu sawiin Trump a chak zawk hret a, Biden chu a che chhe lutuk a ni a ti.
Democrat Shana Ziolko thung chuan debate enhahthlak a nih thu sawiin chak zawk an awm lo a ti thung.
Liberal pollster Data for Progress tena post-deabet poll an lakah 62% in Trump chak zawkah an ngai a, 30% chauhin Biden chu debate a chak zawkah an ngai thung.