Defender Hato manah Chelsea leh Ajax inrem
Kum 16 mi a nih laia Ajax Amsterdam club tana a inlan phak avanga he Dutch team ropui tana khel thei naupang pathumna ni pha Jorrel Hato lei tura Chelsea sum phawrh ngam zat chu Ajax lamin an pawm fel thei ta.
A tirah sum hmahruai atan London club hian pound maktaduai 37 an chhunglut phawt dawn a; tunah hian Dutch club supervisory board pawmpuina nghah mek niin, anni lamin appoval an pek hunah team pahnih hian man an inhlan thei tawh ang.
Dutch rawlthar kum 19 mi hian Stamford Bridge club-ah kum sa rih daih contract a ziah rin a ni a, kum 2032 hnu lama an inkawl zui zel dawn leh dawn loh chu hunin a la hril ang a; tunah chuan medical hmachhawn turin west London lam a pan dawn mek a ni.
A club tharin talent nei tha tak Hato an chhawr dan tur hi a la hriat theih mai loh a, backline-ah chuan a ni phawt ang a, left-back lama a chhawr theih laiin central defence atan pawh a rintlak a, khawi zawkah nge an tlantir dawn hriat theih a ni mai rih lo.
Tarlan tak angin, February 2023 khan kum 16 leh ni 335-a upa ni chungin Hato hian Ajax senior debut a nghak chhuak a, he club tana Eredivisie game khel thei naupan lama a pathumna a nih phah.
Ajax tan hian match 75 khel tlingin, kum 2023 khan Netherlands senior debut a tan bawk.
Kum hnih chhung ngawt Ajax hian Champions League khelh theih loh vangin an sum hmuh tur an hloh tawh a, tun season atanga Europe top-tier competition-a kir chauh tur an nih avangin sumtuakna atan an defender ngaihzawn hlawh tak hi hralhchhuah an mamawh a, Premier League club lian nen inremna an siam thei ta a ni.
Blues hian tun nipui bazar-ah hian ‘attacker’ dang pawh an la beisei zui zel a, RB Leipzig atanga Xavi Simons lachhuak turin indawrna an kalpui mek.
Hralhchhuah lam pawh an rilru senna lam ni thoin, Christopher Nkunku bakah striker Nicolas Jackson-te chu lei theih tura an phochhuah mekte an ni.
Enzo Maresca first team zingah hian player tlangtla tawh vak lo rual - Raheem Sterling, Ben Chilwell, Renato Veiga, Axel Disasi, Carney Chukwuemeka, Armando Broja leh Lesley Ugochukwu-te pawh an la kat nuk a, engtinnge squad an inthenfai zel dawn hriat mai theih a ni rih lo.
Hato hi tun nipui chhunga Chelsea squad zawm thar pariatna tur chiah niin, heti zat player manah hian pound maktaduai 250 an seng tling tawh a, an inhralh thawlna atangin pound maktaduai 150 an lei tling ve tawh bawk.
Chelsea player lei tawhte bihchianna tawi tarchhuak ila.Jamie Gittens
£48m man hi Borussia Dortmund atanga an sengluh niin, England youth international hian Bundesliga lamah tawnhriat a nei nual hman tura ngaih a ni a, tlarhnung thiah kawnga bil lo tak winger hi kan lo chik dawn nia.
Joao Pedro
Brighton atanga £55m senga an lakluh Brazilian forward hi season liamta khan Premier League-a player chetha pawl zingah a tel a, amaha theihna hrang hrang (creativity, link-up play & finishing ability)-te kha Stamford Bridge hruai thlengtu a ni.
Liam Delap
£30m senga Ipswich Town atanga an lei he powerful striker hian Premier League experience a nei tha tawh a, Chelsea attacking lama duhthlanna titamtu tur a ni.
Mamadou Sarr
Lyon atanga £12m senga sengluh he centre-back rawlthar kum 19 leka upa la ni hi hmalam hun nei eng berte zinga mi a ni mek a; Lyon academy pum chhuak a ni.
Dario Essugo
Sporting CP atanga £18m-a lei chhuah Portuguese midfielder ngaihven hlawh chho mek Essugo hi kum 16 mi lek ni chunga Liga Portugal lama inlan thei a nih avangin a nep thei lo!
Estevao Willian
He Brazil winger hi kumin nipui laia Blues-in Palmeiras atanga £29m senga an lakluh chauh ni mah se inremna an siam hun chu May 2024 daih tawh kha a ni.
Kendry Paez
£17m senga lei Ecuadorian rawlthar Paez phei hi chu kum 2023-a tihfel tawh niin, kumin May thlaa kum 18 a rawn tlin chhoh khan Chelsea nen an inzawm thei ta chiah a ni.