Delhi-a in kangah mi pakua thi

Pathianni tuka Delhi-a Vivek Vihar area, Shahdara-a chenna inah kangmei nasa tak chhuakah mi pakua an thi tih police-ten an sawi a, mi 10 chuang chhanchhuah an nih thu an sawi.
Kangmei a chhuah thu hi zing dar 03:48 velah Vivek Vihar Police Station chuan an dawng tih police chuan an sawi a. Delhi Fire Services (DFS) hotute chuan a minute khat, zing dar 03:47 vela hriattir an nih thu leh team an tlan nghal niin an sawi a. Zing dar 05:00 thleng a thelhna hmanrua 14 nen an bei tih an sawi.
Fire department thuneitute chuan kangmei hi in chhunga bungrua atanga tan niin rang takin flat paruk velah a kai nghal niin an sawi a. “DFS hian mi 12-15 vel an chhanchhuak,” tiin department thupuangtu chuan a sawi.
Deputy Commissioner of Police (Shahdara) Rajendra Prasad Meena chuan kangmei hi chhawng hnihna, chhawng thumna leh chhawng lina flat hrang hrangah a darh niin a sawi.
“Kangmei thelhtuten mi 10-15 vel an chhanchhuak a, an zinga pahnihin hliam tenau an nei a, Guru Teg Bahadur Hospital-ah enkawl turin lak an ni,” a ti.
Thuneitute chuan in sak danah chet a har avang leh a chhunga mi tang an tam avangin darkar nga chuang zet a thelh leh chhanchhuah hna hi thawh a nih thu an sawi.
DCP Meena chuan building hma leh hnunga flat awm avangin kang thelhtute tan luh a harsa niin a sawi.
Zing dar 06:25 velah kangmei hi an thunun a, zing dar 08:00 pelh hnuah an timit vek a, thelhtute chuan a chhung an dap zui a. DFS thupuangtu chuan, “Inte kan dap a, ruang kang kan hmu a, chhawng khatnaah ruang pakhat, chhawng hnihnaah panga leh staircase-ah pathum kan hmu a ni,” a ti.
Tualchhung mite chuan air conditioner puak vangin kangmei hi a chhuak ni theiin an ngai a, thuneitute erawh chuan a chhan hi an la finfiah lo.