Delhi chief minister atan Gupta-i la lut ta

Delhi chief minister atan Gupta-i la lut ta
India-a rorel lai, Hindu-nationalist party atangin Delhi chief minister thar lak luh a ni ta a, kum tam tak hnuah chiang taka inthlana hnehna changin khawpui ber hi an enkawl tan ve dawn ta.
Prime Minister Narendra Modi-a telna BJP MLA kum 50 mi, Rekha Gupta-i chu Indian khawpuiah hian Ningani tlai khan lak luh niin mi maktaduai 30 chuang chenna khawpui chief minister atana hmeichhia palina a ni.
Law-a degree nei, zirlai pawla a inhman lai atanga politics-a sulhnu lo nei tawh, Gupta-i hi Nilaini tlai khan dan angin an party MLA-te chuan an hruaitu turin an thlang a ni.
Tun thla tirah Delhi-a inthlanah BJP hian kum 27 hnua a vawi khat nan chiang takin hnehna an chang a. Assembly bial 70 awmah bial 48 lain rorel lai, chief minister hlui, Arvind Kejriwal-a kaihhruai, Aam Aadmi Party (AAP) chuan bial 22 chiah an chang.
BJP hian ram pum sorkarah thuneihna chang mah se Delhi bikah hian kum 1998 atang khan sorkar an nei thei tawh lo va, tun tuma hnehna an chang hi an hriat reng tawh tur niin a lawm pawh an lawm hle.
Kejriwal-a kaihhruai party-in Delhi hi kum 10 kaihruaiin Modi-a pawh an bei nasa hle thin.
Kejriwal-a hi ei ruk dotu langsar tak thin a ni a; mahse, nikum khan ei ruk thubuai avangin thla tam tak lung in a tang a. Amah chuan engmah dan bawhchhiat a neih loh thu leh Modi-a kaihhruai sorkar laipuiin an beihna mai mai niin a sawi.
Delhi-a BJP-in hnehna an chang hi kum 74 mi, Modi-a tan phurna thlen theitu a ni a. Ani hi nikuma ram pum inthlanah chak lehin a zawna a vawi thum nan a sorkar leh a; mahse, a hmasa pahnihte aia che chhiain party mal phei chuan sorkar a siam thei lo va, thawhpuite puihna nen sorkar intawm an siam.
Gupta-i hian a hmabakah chona lian tak tak a nei a, heng zingah hian retheihna leh bawlhhlawh pawh a tel.
BJP general secretary thin, kum 1992-a Delhi University zirlai hruaitu hlui a ni a. Hmeichhiate leh naupangte bakah hmeichhe zirlaite hamthatna tur aupuitu anga hriat hlawh a ni thin bawk.
Chief minister atana thlan chhuah a nih hnu lawkah Gupta- hian ‘khawtlang, hmasawnna leh Delhi khua leh tui zawng zawngte thatna turin rinawm takin, inpekna leh thawhrimna nen a bei dawn’ tih X-ah a tar lang.
February 5-a inthlan hma khan an party hian sorkar sikul tichangtluna siam that an tiam a, damdawi inenkawlna a thlawna pek te a thlawna electricity pek leh Delhi-a hmeichhe rethei hnena thla tin Rs. 2,500 chuang pekte pawh an tiam.
Delhi-a boruak bawlhhlawh tak, thlasik chhung thla eng emaw zat tibuai ziahtu chu a hmaa chona lian tak a tling dawn bawk.
New Delhi hi khawvela khawpui boruak bawlhhlawh ber ni reng niin World Health Organization (WHO)-in a him chin a tih aia a let 60 chuanga sangte a ni reng thin.