Delhi-NCR-a ui man khawm turin inhnialna la siam zel

Delhi-NCR-a ui man khawm turin inhnialna la siam zel
Supreme Court-in Delhi leh National Captal Region (NCR)-a khawlai uite man khawma an awmna tura dah khawm tura thupek a siam chuan inhnialna a siam nasa mek zel.
Tun hnaiah ui seh an tam em avangin mi tam tak chuan ‘an thaw huai dawn’ nia an sawi laiin ui hmangaihtute chuan ui senghawi vek hi a dik ngawt bik lo tih an sawi ve thung.
Ui hmangaihtute chuan khawlaia ui awmte hi invenna pek vek an nih chuan lak bo an tulna a awm lo tih an sawi a. Sorkar chuan an pian pun dan thununna lam chauh a ngaihtuah niin an sawi a, an pian punna a thunun zawh loh avangin hetiang thutlukna hi siam a nih phah niin an sawi bawk.
Sorkarin an chhinchhiah dan chuan Gurugram-ah ringawt pawh thla tin ui seh mi 700 leh 800 inkarin damdawi in an pan ziah a. Heng zinga a tam ber hi ui vulh laiin a sehte an ni a, damdawi inten ui a laka invenna inchiuna tur a tlachham ngai lo niin tar lan a ni bawk.
Ui seh hi tun hnaiah Delhi leh a chhehvelah an tam hle a. Thenkhat chu mi a seh lai CCTV-a lo lak fuh, a vulhtuin thunun a tum pawha a theih loh pawh hmuh tur a awm.
Ui seh vanga hliam na tak tuar mai ni lo, thih phah hial pawh an awm nual tawh a. Hei vang hian mi tam tak chuan court sang ber thupek hi tha an ti a, zalen takin khawlai an len theih phah dawn niin an sawi hlawm.
Hetih lai hian ui ngainatute chuan Supreme Court thutlukna siam hi an pawm lo hle thung.
“An pian punna tur thunun hi tih ngei ngai a ni a. Delhi-NCR huam chhungah ui tlate hi manin hri danna pek vek an ni ngei tur a ni. Sorkarin thawk tur mahnia inpe a mamawh a nih pawhin thawhpui theih reng an ni a. Hmun danga ui dah sawn hi thil kalphung tur a ni lo va, a dik lo,” tiin tlawmngai pawl, Save Animal-a tel pakhat chuan a sawi.
Ui ngainatu zingah pawh court thupek tha ti an awm a, hetih rual hian an man khawmte chu enkawl that a nih loh an hlau thung a. Enkawl dan tur angin enkawl an nih loh chuan uite dinhmun chu khawngaihthlak tak a ni thei dawn tih an sawi hlawm.
Supreme Court thupek ang chuan Gurugram leh Faridabad, Haryana telin, Delhi-NCR huam chhunga khawlaia neitu nei lova tla uite chu man khawmin dah khawm an ni ang a, tihchin an ni ang a, invenna pek an ni bawk ang.
Thupekah hian ui 5,000 vel dah theihna tur hmun chu chawlhkar ruk atanga riat chhunga siam zo tura tih a ni bawk a. Court hian ui lak bo duh lotu laka na taka hma lak a nih tur thu a tar lang bawk.
Court thupek a chhuah hnuah Delhi-a India Gate hmaah ui ngainatuten thupek duh lohna lantirin an pungkhawm tawh a, heng mite hi police-in an la a, chhuah lehnghal erawh an ni.