Delhi transport minister in AAP chhuahsan

Aam Aadmi Party (AAP) senior leader leh Delhi sorkar a transport minister leh department dang dang chelhtu ni bawk Kailash Gahlot chuan an party inkaihhruaina leh chhungril lama harsatna an tawh hrang hrangte avangin an party chu awm zelna tlaka ngai lovin AAP atanga banna a thehlut.
Gahlot hian an party hruaitu lu Arvind Kejriwal hnenah a banna hi thehlutin, an party chuan an tih theih loh tur leh thil theih loh an sawi nasa hle tawh niin a sawi a, mipuite chu an dikna chanvo humhalhsak aiin mahni an inhaivur mah mah tawh niin a sawi bawk.
Tin, Delhi sorkar chuan national capital nih a tlin a ngaih thu sawiin, central do zawnga hun a hmang fo a nih chuan hmasawnna a awm ngai dawn lo niin a sawi bawk a, a banna lehkhaah hian an party duhkhawp lohna a ziak sei hle.
AAP atanga inhnuhdawk mai loh chu tih theih dang a neih loh thu leh ban mai chu thaa a hriat tawh thu a sawi a, a awm zel dan tur erawh a ziak tel lo thung.
Delhi hian nakkum kumtir hian assembly inthlanpui hmachhawn dawnin, AAP hian sorkar siam leh ngei an tum ruh hle a, tuna an minister leh party senior member banna hian a nghawng na hle in a rinawm.
Gahlot hian party dang a zawm dawn leh dawn loh engmah hriat a la ni lo a, AAP hian a banna hi an pawm dawn em tih pawh a la hriat rih lo a ni.