Delta thlawhna engine kangah a chuangte thiar chhuak

Delta thlawhna engine kangah a chuangte thiar chhuak
Florida-a Orlando International Airport-a Delta thlawhna chu a khawlpui (engine) a kan avangin a chuangte chu thiar chhuah vek an ni.
Social media-a video darhah chuan thlawhna engine ding lam zawk chu a kang a, a khu nasa hle bawk a, passenger-te chu rikrum a awma an chhuahna tura ruahman, inflatable emergency slide hmanga lak chhuah an ni.
Delta flight 1213 hi Disneyworld avanga hriat hlawh, Orlando atanga thlawk chhuaka Atlanta pan tur niin mi 300 dawn a phur a. Thi leh hliam an awm lo.
“Passenger-te thiar chhuah an ni a, Aircraft Rescue & Fire Fighting team an che chhuak nghal vat a ni,” tiin tumhmun chuan social media-ah an tar lang zui.
Airbus A330-ah hian passenger 282 leh thawktu 10 leh a khalhtu pahnih an chuang niin Delta chuan thu an chhuah.
Airline hian thlawhna engine pahnih zinga pakhat zawk a kan hnuah thawktute pawh cabin atanga lak chhuah vek an ni tih a sawi.
Terminal atanga video lak thehdarhah chuan passenger-te hian thlawhna tlankawngah thlawhna bul maia emergency vehicle dingte chu an nghak tih a lang thei.
“Min dawrtuten min puihnaah lawm thu kan sawi a, an thil tawn avangin ngaihdam kan dil bawk,” tiin Delta chuan thu an chhuah.
“Himna aia pawimawh zawk a awm thei lo va, Delta team chuan min dawrtute hi an tum hmun an thlen thuai theih nan ruahmanna kan siamsak a ni,” an ti bawk.
Federal Aviation Administration chuan he thil hi an chhui nghal.
Kuminah hian North America-ah hian thlawhnaa chet chhiatna lian tak tak a thleng zing ta hle.
January 29 khan passenger phur leh sipai helicopter chu Washington DC-a Ronald Reagan airport bula van sangah insuin mi 67 an thi a. Chhuitute chuan tumhmun hnaihah helicopter thlawhtir phal loh ni se tiin an rawt zui.
February 17 khan Delta Air Lines thlawhna chu Toronto-a a tum dawnah chesualin a let a, a chuang mi 80 erawh an him vek thung.
Minneapolis-ah pawh tlankawngah thlawhna tlengin a thal zawngin a awm a, a kang bawk a, kang thelhtuten an thelh mit a, tumah thi an awm lo hlauh bawk.