Denmark in a thak lutuk avangin Korean Ramen te hnawl hmak

Denmark chuan South Korean company Samyang te siam spicy ramen noodle product te chu a thak lutuk tia sawiin capsaicin level tam lutuk chuan consumer te harsatna a thlen thei tiin chawkluh a khap.
Samyang instant ramen chi thum : Buldak 3x Spicy & Hot Chicken, 2x Spicy & Hot Chicken leh Hot Chicken Stew te chu chawkluh a khap a.
Denmark food agency chuan thuchhuah a siamah consumer te chu heng product te hi hnawl turin a ngen a ni.
Mahse Samyang te chuan an food quality-ah engmah harsatna a awm lo an ti thung a. “Danish food authority te hian kan product te a quality chhiat vang ni lovin a thak lutuk avangin an hnawl a ni” tiin an sawi a.
“Kan product te hi khawvel hmun hrang hrangah kan thawn chhuak a. Tun hi a thak lutuk avanga hnawl a nih kan tawn tumkhatna a ni,” tiin an sawi bawk.
Danish Veterinary and Food Administration chuan heng product a capsaicin level chu test neiin a san em avangin acute poisoning a thleng thei tiin an sawi a.
“Heng product hi in la kawl a nih chuan in paih bo emawin leina dawrah in thleng thei ang,” tiin thuchhuah siamin an sawi bawk.
Naupang te tan phei chuan a thak lutuk avangin thil tha lo a thlen thei an ti bawk a. Sorkar thutlukna siam chuan online-ah inhnialna nasa tak siamin spicy food duhte an lawm lo hle thung.
Samyang te chuan Denmark a local regulation chu zirchian phawta chumi hnuah chhanna siam chauh an tum thu an sawi a. Heng noodle te hi khawvel ram dangah chuan hawlin an la awm lo a ni.
Capsaicin hi hmarchaa chemical compound awm niin thak siamtu ber a ni a. Mihringin hmarcha a eiin capsaicin tichhuakin chu chuan thak a siam ta a ni.