Denny Laine a thi
Wings leh The Moody Blues co-founder Denny Laine, kum 79, chu an rama December ni 5 khan a thi a, a nupui Elizabeth Haines chuan Laine-a Facebook page-ah, “Ka pasal duhtak chu tukin khan thlamuang takin a chawl ta. A kiangah awmin ka kut ka vuan a, a Krismas hla duh tak ka play sak bawk. Krismas hla hi kar eng emawti kalta atang khan sak nuam a ti a, ICU-ah ventilator nena enkawl a nih hnu pawhin ka play sak zel a ni. Dam takin in a haw leh kan inbeisei laiin, vanduaithlak takin a chuap natna, Interstitial Lung Desease (ILD) chu rawh thawk leh thutin, infection tin mai chuan a chuap tihchhiat belh a tichak lo tial tial a. Nitin tan khawhin a bei let a. A chakin a huaisen a, a phunnawi ngai lo. A thlakhlelh ber chu kan nupa kan ina kan zawhte Charley te nena awm ho a, a gypsy guitar perh leh theih a ni. In hmangaihna leh support-na zawng zawngah a lawm em em a, a mittui a titla hial a ni. Min hmangaihna leh duhsakna zawng zawngah lawmthu ka hrilh a che u,” tiin a post.
He english musician hi October ni 29, 1944 a piang niin, naupan lai atanga guitar ngaina, jazz guitarist ropui Django Reinhardt ngaisang em emtu a ni. 1964-ah Mike Pinder nen British rock group The Moody Bluesan din a, an hla hit hmasa ber ‘Go Now’-ah lead vocal a ni a, he hla hi UK singles chart-ah No.1 kaiin, Billboard Hot 100-ah pawh No.10 a kai. Mahse, group-ah a tel rei lo va, 1965-a The Magnificient Moodies an tihchhuah hnuah a chhuahsan a, 2018-a Moody Blues hi Rock and Roll Hall of Fame-a lakluh an nih khan group member anga tarlan tel tho a ni thung.
Moody Blues hnuah Electric String Band dinin, mi hrang hrang a play kual pui ve zak zak a, 1971-ah Paul McCartney leh a nupui Linda McCartney te band thar Wings-ah telin, 1973-ah an band album hlawhtling ber Band on the Run an tichhuak leh ta a ni. McCartney te nen hian kum 10 zen zawn chu an tiho dal dal a ni. Wings tawp hnuah pawh Laine leh McCartney te hi an la intitha chhunzawm zel a, 1982-a McCartney hla ‘Tug of War’ leh 1983-a ‘Pipes of Peace’-ah te pawh a la pui ta zel a ni.
Denny Laine a thi
Get real time updates directly on you device, subscribe now.