Mariah Carey ‘All I Want for Christmas Is You’ a lar ber

Mariah Carey ‘All I Want for Christmas Is You’ a lar ber
December thla kan chuangkai ta bawk a Krismas hla a lar leh ta a, Mariah Carey Krismas hla chuai thei lo ‘All I Want for Krismas Is You’ chu kar khat chhunga khawvel huapa hla lar ber niin, Billboard Global 200 chart-ah a No.3 atangin No.1 a kai leh ta, Krismas hla dang pali chart top 10-ah a lang bawk.
Billboard Global 200 chart hi kar khat chhunga khawvel huapa hla lar dan tehna niin, chart ranking siam nan hian ram hrang hrang 200 chuanga official-only streams (ad-supported leh subscription audio leh video music services) leh download sales te chu tehna pawimawh a ni.
Carey ‘All I Want for Christmas Is You’ hian ram hrang hrang 200 chuangah stream maktaduai 73.4 leh sales 6,000 a kai thei a, hei hi chart-ah No.3 atangin No.1 a kaipui leh ta a ni. He hla hi 1994 a tlangzarh kha a ni tawh a, 2020 krismas vuakvetah he chart-ah hian kar li chhung No.1 niin, 2021-ah kar li bawk a No.1 leh a, 2022-ah kar nga a No.1 tawh a, he chart-a No.1 nih ngunah Harry Styles ‘As It Was’ chiah a pha lo a, he hla hi 2022 khan kar 15 a No.1 tawh thung a ni.
Wham! ‘Last Christmas’ pawhin stream maktaduai 62.1 leh sales 4,000 tlingin No.9 atangin No.2 a kai ve leh ta a, he hla pawh hi 1984-a tlangzarh tawh kha niin, he chart No.2-ah hian kar sarih a awm tling ve ta a ni.
Jack Harlow “Lovin on Me’ chu No.2 atangin No.3-ah a tawlh a, Brenda Lee “Rockin’ Around the Christmas Tree’-in stream maktaduai 48.6 leh sales 3,000 tlingin No.17 atangin No.4-ah a invawrh a. He hla, 1958-a tlangzarh tawh hian nikum Krismas boruakah khan chart No.2 a lo kai ve zauh tawh bawk a ni.
Kar kalta chart No.1 Tate McRae ‘Greedy’ chu No.5 a tawlh ve thung. He hla hi chart-ah kar hnih a No.1 tawh a ni.
1957-a Bobby Helms hla ‘Jingle Bell Rock’ chuan stream maktaduai 42.2 tlingin No.24 atangin No.6-ah a invawrh a, 2014-a Ariana Grande hla ‘Santa Tell Me’ pawhin stream maktaduai 35.6 tlingin No.35 atangin No.8-ah a invawrh kai ve leh ta bawk. Heng hla pahnih te hian a hmain chart No.4 leh No.5 te pawh an lo kai ve tawh bawk a ni.