DEO-in party aiawhte kawm

Mizoram MLA inthlanpui vote chhiar chungchangah Aizawl district election officer, bawrhsap Nazuk Kumar chuan Ninagni khan political party aiawhte a kawm a. Ruahmanna siam dan leh thu pawimawh inhrilhhriat ngaite sawiho a ni.
Election Commission ruahmanna ding mekah chuan vote hi December 3 zing dar 8.00 atanga chhiar tan tur a ni a. Counting agent-te chu zing dar 7:00 ah a hmun thleng vek tura beisei an ni. Strong room hawn leh vote chhiar zawha khar a nih lai hian party aiawhte an tel tur a ni bawk.
Aizawl district-ah chuan counting centre pathum – DC pffice, Assembly Secretariat Annexe basement leh Govt. Aizawl College Sikulpuikawnah te siam a ni a. Vote chhiarna counting hall chhungah mobile phone kenluh phal a ni lo. Venhimna pawh thuah thumin Central Armed Police Force, IR Battalion leh Mizoram Police te an duty dawn a, medical duty leh tul dang pawh ruahmanna siam a ni.
DC office ah hian Aizawl North-II, Aizawl North-III, Aizawl East-I, Aizawl East-II, Aizawl West-I leh Aizawl West-II assembly constituency-a vote tla chhiar a ni anga, Assembly Secretariat annexe-ah Tuivawl, Aizawl North-I, Aizawl South-II leh Aizawl South-III constituency-a vote tla chhiar tur niin, GAC-ah Aizawl West-III leh Aizawl South-I assembly constituency-a vote tla chhiar a ni ang.