Department aiawhten cyber crime zir

Mizoram sawrkar department hrang hrang aiawhten chuan cyber crime laka himna tura an hriat tur tul leh hemi kaihhnawiha dan awm an zirho.
Mizoram State Legal Services Authority (MSLSA) leh Mizoram Police tangdun huaihawtin Zirtawpni khan cyber crime chungchang inzirtir a ni a. Hmanpuitu Assam SLSA executive chairman, Gauhati High Court judge Justice Michael Zothankhuma chuan, technology a inthlak danglam chak hle laiin dan leh hrai siam chhung erawh a rei thin si a, sualna leh inbumna thar chi hrang hrang lo piangah a venna leh hremna tur dan inkarah kar awl a awm thin tih a sawi.
He kar awl hnawhkhat tur leh cyber crime chak taka do tur chuan dan kengkawhtute – police leh judiciary an tanho a ngai, tiin, judiciary-in cyber crime chhuina leh hremna tura digital evidence leh kawng danga hma an lo lak tawh a sawi a. Cyber crime laka invenhimna hmasa ber leh pawimawh ber chu mipui zirtir that a ni tih a sawi.
MSLSA executive chairman, Gauhati High Court judge Justice Pu Nelson Sailo pawhin, kum 2017 khan Supreme Court chuan India danpui Article 21 hnuaia Fundamental Rights zingah ‘Right to Privacy’ a pawm a, he thutlukna zulzuiin Parliament-in kum 2023 khan mitinin anmahni data venhimna chanvo (right) humhalh saktu – Digital Personal and Data Protection Act 2023 a pass tih a sawi.
India ramah cyber crime a pung nasa tih sawiin, kum 2023 khan case 86000 chuang file a ni a, Mizoramah pawh kum 2022- 2026 chhungin cyber crime case 361 a awm a, kumin bikah March thleng hian case 5 file a nih tawh tih a sawi.
Financial fraud, social media impersonation leh sexual harrasment case a tam zual, tiin, cyber crime laka inveng turin antivirus software hman, file hriat loh hawn loh/ download loh leh police station-ah a rang thei ang bera report a tul tih a sawi a ni.
DGP Pu Sharad Agarwal chuan, cyber crime a pun nasat avangin dan kengkawhtute tan a luhai thlak a. Tunlai thiamna artificial intelligence (AI) hmangin thlalak (phishing) leh video lem (deepfake) a darh nasa a, AI chu password pawimawh ruk chhuahna atan leh virus thehdarhna atan hman thin a ni tih a sawi. Cyber crime laka invennan Mizoram Police chuan Technical Support Cell a din a, data him leh him loh endiknan digital forensic tool pawh an hmang tangkai tawh tih a sawi bawk.
Cyber Security Corporation international trainer, Digital Forensics & Cyber Law president Dr Harold D’Costa chuan training hi a kaihruai a. SP Cyber Crime Zonunsanga leh JMFC cum Civil Judge (Jr. Div) JH Lalparmawii ten cyber crime chungchanga hriat tur an zirtir.