Department dawr nuam nih tum ang – Revenue minister

Department dawr nuam nih tum ang
– Revenue minister
An department chu mipui tana dawr nuam tak nih tum turin Land Revenue & Settlement minister B Lalchhanzova chuan thawktute a fuih.
Thawhtannia Mizoram Survey and Land Record Service Association (MISLARSA) inkhawmpui a hmanpuinaah LR&S minister chuan, ram chhiat thata mawhphurtu an ni a, an inenkawl danah hmalam êng an neih avangin thil tihfel a awlsam tan hle tih a sawi a. Anmahni dawrtute hriat theih hial turin an hmelah pawh phurna lantir tum a, department dawr nuam tak nih tum turin a chah.
Thawktute chu thlemna leh vauna an dawn thin a ring tih sawiin, “Thil diklo chu huaisen taka kan dodal ngamnan keimah ngei pawh dem kai lo tura kutfaia awm ka tum. Hei hian Revenue department-a thawk zawng zawngte phurna leh huaisenna petu ni thei se ka duh,” a ti.
Assam Rifles ram chhuah san tur tehthat leh buaipui ngai hnehsawh taka LR&S department-in a buaipui chu thil chhinchhiah tlak tak a ni tih minister hian a sawi a. Revenue department chu ram inrelbawlnaa department pawimawh ber zing ami a ni, tiin, “Revenue administration chaklohna leh thatlohna ram a changkang thei lo a. Hemi kawngah hian Pu Lalduhoma kaihruai sawrkarin Revenue department pawimawhna a hmuthiam a, state tana sum thawkchhuaktu a nih bawk avangin thuamchak tum mek a ni,” a ti.
Thawktu lakbelh, revenue dan ennawn, district office building sakthat, thawktute quarters sakthatah sawrkar a inhawng tih a sawi a. Department-a thawktuten mawhphurhna an neih chu hawihawm taka hlenchhuak thin turin a chah.