Department hmingchhia anga min ngaih na hi thlak ka tum – Revenue minister

Department hmingchhe tak anga miin an ngaih chu department dik leh tha taka siam a tum a, mipui kamchhe tleuhnana hman thin chu mipui tana service tha petu an nih theih nan tan lak a tum tih Land Revenue & Settlement minister B Lalchhanzova chuan a sawi a. Kumin September-ah chuan an kalphung inher rem hman tumin tan an la dawn tih a sawi.
Thawhlehni khan Land Revenue & Settlement department chuan state level-in Aizawlah inhmuhkhawm an buatsaih a. He department-in a enkawl district zawng zawng bakah Secretariat leh Directorate-a thawk officer-te leh thawktu dang thahnem tak an tel.
Minister chuan thawktute hmaah thu sawiin, inrelbawlna a fuh loh chuan hmasawnna a kal dik thei loa, LR&S-a thawktute chu ram enkawl hna an thawhnaah dik leh langtlang taka an theihna zawng zawng an pek chuan a tha zawnga inthlakthleng a awm mai dawn tih a sawi. Department hmingchhia anga miin an ngai chu department tha, dik leh nung taka siam a tum tih sawiin, mipui kamchhe tleuhna ni reng loin, mipui tana service tha tak pek a duh a, kumin September-ah chuan an kalphung leh hawi zawng inher rem hman a duh tih a sawi a ni.
Hemi kawngah hian amah chu hmahruaitu a ni dawn tih sawiin, “ “Kan hna hi Pathian min pek a nih angin, amah leh mipui rawngbawlnan hmang ang u,” a ti a. Harsatna an neih chu a hnenah tlang tak leh tlangnel taka thlen thin turin a chah. “In minister ka ni a, a tul hunah chuan in thian ka ni anga, a tul hunah erawh ka khawng viau dawn tih hria ang u,” B Lalchhanzova hian a ti.
Inhmuhkhawmah hian LR&S secretary Dr H Lalthlangliana leh director K Vanlalthiana te pawhin thu an sawi a. District hrang hrang aiawhin settlement officer-ten an harsatna leh hnathawh an sawi a ni.