Department hnuaia hmasawnna ruhrel din mekte thlir ho

Health & Family Welfare department hmasawnna ruhrel tunhnaia din zawh, din mek leh hmachhawpte sawiin Nilaini khan a changtu minister Dr R Lalthangliana leh department hotute an thukhawm.
Health minister chuan hrileng avangin kum hnih chhung infrastructure buatsaih leh building sak hna a khaihlak a, hri a kian hnu in department-in tan a khawh a, tunah chuan infrastructure lamah hma an sawn a, building thenkhat sak zawh tawh niin thenkhat peihfel tep a ni a, tun thla chhunga a theih chin chin zo turin a chah tih a sawi.
Cheng vaibelchhe 103 senga sak Zoram Medical College Academic building thar chu August 7 hian chief minister hawn tir tum a nih thu a sawi bawk.
Department engineer-ten hna hrang hrang sak mek leh sak tura tintuah dinhmun leh thlen chin an sawifiah a. District Hospital thenkhata Critical Care building sak, khum 50 awmna AYUSH Hospital Kulikawn, Mizoram hmun hrang hranga primary health centre sak, Mamit District Hospital sak mek, district thar pathuma Chief Medical Officer office building sak, World Bank project hnuaia District Hospital thenkhat tihchangtlun tum, Aizawl district huamchhunga Urban PHC 6, Lunglei district huamchhunga 4 leh district dang zawng tana pakhat theuh sakna tur, Saituala khum 10 awmna tur AYUSH damdawi in leh MSACS hnuaia State Resource Centre for HIV/AIDS din te a ni.