Department hoin office tifai

Swachh Bharat Mission (Urban) UD&PA Department leh Swachh Bharat Mission (Grameen) PHE Department tangdun buatsaih Swachhata Hi Seva 2024 kalpui mek leh Faina Hapta pualin Zirtawpni khan sawkar department hrang hrangin an office leh a chhehvel tifaiin an hnatlang.
Swachhata Hi Seva hnuaiah hian Mizoram pum huapin faina kawnga hmalakna tur hrang hrang, khawpui leh thingtlangah hmun 2052 ruahman a ni a. Bawlhhlawh chhek khawm tam zualna – cleanliness target units (CTU) 398 thlanchhuah niin, heng zinga 262 hi tihfai tawh a ni. Swachhata Hi Seva Campaign 2024 hi September 17 atanga kalpui tan niin, October 2-a khar tur a ni. Faina Hapta hi September 23-a tan niin, October 2-ah a kharna hun district tinah hman a ni ang.
India hnampa Mahatma Gandhi pian champha leh Swachh Bharat Mission kum 10 tlin lawmna denchhenin October 2 hi Swachhta Diwas (Faina Ni) atan hman tur a ni a. Aizawlah a lawmna pui ber hi UD&PA department leh PHED tangdunin buatsaih a ni dawn. Swachhata Hi Seva campaign chhunga inelna hrang hrang buatsaih lawmman sem nghal a ni ang.
Swachhata Hi Seva campaign a hlawhtlin theih nan hian chief secretary kaihhruaina hnuaiah State Steering Committee din niin, district tinah bawrhsap-te kaihhruaiin District Steering Committee din vek bawk a ni.