Department website … \anlak a ngai

Tunhma ai chuan hma an sawn viau hlawm tawh na a, sawrkar department enkawl website-te hian duhthu an la sam lo hle a tih theih awm e. Regular taka website vil thei department thenkhat an awm laiin, department tam zawk chuan ‘regularity’ hi an la kalpui thei chiah lo niin a lang.
Department thenkhat, activity update tur nei regular an awm laiin, activity update tur nei reng lo department hi a awm ve theih viau awm e; entir nan, Irrigation & Water Resources Department, Sericulture, Fisheries etc..ang te hi.
Chutih rual erawh chuan, update tur nei reng lo department kan tih zingah hian, an website-ah mipui tana information pawimawh dah mumal chuang lo a la awm leh theih bawk.
Department website zingah, agriculture, horticulture, sericulture, AH&Vety, fisheries, irrigation & water resources department te hi mipui tam zawk kaihhnawih an ni a, a chhan chu Mizoram mipui 60-70% hi kuthnathawktute an nih vang a ni. Regular taka information an update a pawimawh hle a ni.
Department zingah activity langsar lo, mahse pawimawh zet chu Irrigation (IWRD) hi a ni kan ti thei awm e. Agriculture leh horticulture nena inzawm tlat a ni a, thlai zawng zawng mamawh ‘tui’ lam ngaihtuahtu dept a ni a, a mawhphurhna a pawimawh hle a, tuna full-fledge technical department a nih tak hnu phei hi chuan, chak zawk leh puitham zawkin hna a thawk thei tawh dawn a, chutiang tur chuan mipui pawhin an beisei dawn a ni.
Irrigation website-ah hian kum 2020-a ‘ongoing project’ tih kha kum 4 a ral tawh hnuah a la ‘ongoing’ reng mai te hi, update ngai niawm tak a ni.
IWRD hian minor irrigation project a lo thawk nasa hle a, Mizoram pumah MI project 439 a thawk zo tawh a, project thawh nan hian cheng vaibelchhe 330.2 (Rs 3,302,837,569) sen a ni a, a ram (CCA) chawm zat zau zawng belhkhawm chu hectare 18,228 (Sqkm 182.28) a ni. IWRD hian kum 2020 khan National Water Award (Best State) a lo dawng tawh bawk. Mizoram thlai chingtute hian water award an pe ve thei angem tih chu kuthnathawktute kutah dah ila.
Department-te hian website-ah hian information leh data bakah, analysis thleng hian dah thei se a duhawm hle a. Hetiang kawngah hian Fisheries department hi a fakawm hle.
Hei bakah hian, departament kaihhnawih Central scheme tha tak takte pawh hi website-ah hian tarlan tel thin ni se, dept website-te hi mipui tan a chhenfakawm lehzual ngei ang.