Derby chep takah Barcelona chak tlai

Inrinni Spanish La Liga match pakhatah Espanyol khelmual lut Barca-in goal thun an harsat tlat a, draw result an lungawipui mai a ngai dawn nia a lan hman rum rum tawh hnu hun pangngai tawp hma minute li chiah awm tawha an goal hnih tihluh hmangin 2-0 hnehna nen RCDE Stadium-ah point thum an hlawhchhuak leh ta nge nge a, anmahni hnaihbertu Real Madrid laka table-a an hmahruaina chu point sarih lai a ni ta.
Nizan result tarlan hman lohah Bernabeu club-in an mikhual Real Betis laka point thum an hlawhchhuah ve leh theih chuan a sang pahnih luahtute inthlauhna hi point li-ah bawk a chhuk leh ang.
Mipui 36,283 pungkhawm hmaah Inrinni zan khan Espanyol lamin goal an venghim ve tlat a, mahse, minute 86-a Dani Olmo goal leh minute 90 a kal mek laia Robert Lewandowski goal erawh mualneitu team tlarhnungin an dang zo ngang lo a ni.
Barca boss Hansi Flick-a mangangin player a siksawi a, Fermin Lopez chuan amah ang bawka bench atanga khelmual lut ve dang pahnihte goal tur siamsakin an mikhualna hmun atangin Catalan giants-in an hmahruaina an sawhnghet thei hram a ni.
Barcelona hian tun season La Liga bikah second half tawp dawn minute 15 chauh awm tawh chhungin goal 12 an thun tling ta a, heti anga hun tawp dawn minute 15 chhunga heti zat goal khung tling team dang an awm lo.
He Catalan derby nung tha vet vet zetah hian mualneitu Espanyol lamin bul an tan hlauhawm zawk a; tan atanga minute li an khelh tlin rualin Blackburn Rovers forward hlui Tyrhys Dolan chuan mikhual goal zawnah shot a nei a, dansak a ni hlauh.
Mikhual keeper Joan Garcia khan kum kua zet a khawsak hnua nikum nipui thawt lai maia a chhuahsan tak a club hlui Espanyol goal tur a dansak mawlh mawlh a; second half minute 72-ah Nou Camp club a zawm hnua Espanyol lama amah thlaktu Marko Dmitrovic pawhin Eric Garcia goal tur chu hnai set sawt atangin a dansak ve bawk a, a lan dan maiah chuan inhnehtawk mai tur an ni hman!
Tarlan tak angin, hun tawp dawnah Barcelona chak loh hrehin na zawkin an nawr a, minute li chhung lekin goal hnih an thun er zawk a, kum 2009 hnu lama an thenawm Barca laka hnehna lawm tur la nei leh ta ngai lo Espanyol chuan table-ah pangana an luah chhunzawm.
Espanyol goalkeeper Dmitrovic khan Garcia goal tur a dansak hmain Jules Kounde tauhluh tur a namsawnsak bawk a, Inrinni derby-ah goalkeeper pahnih an chetha dun hle.
Barcelona hian Nilaini zan Spanish Super Cup semi-final match-a Athletic Bilbao hmachhawn zui mai tur an nih avangin Espanyol mualah khan an regular player thanekhat bench lamah an thuttir phawt a, goal an khung zo lo takngial dawna a lan hnuah an player tha ho an luhtir a, substitution siam man a awm e!