DIET Lunglei kum 50 tling

District Institute of Education and Training (DIET) Lunglei chuan a kum 50 tlin, Golden Jubilee chu Ningani khan a lawm a. Lunglei High Powered Committee vice chairman V Malsawmtluanga, MLA leh SCERT joint director Caroline Zoramthangi ten an hmanpui.
DIET Lunglei hi 1974 September 28 khan ‘Under Graduate Teachers’ Training Institute’ tih hmingpua din a ni a. 1980 July 4-ah ‘Teacher Training Institute’ tia thlak niin, 1993 February 4-ah ‘District Institute of Education and Training’ (DIET) tih a ni ta a ni. 1975 -2023 chhungin Diploma in Teacher Education (D.T.Ed), Diploma in Education (D.Ed), Diploma in Elementary Education (D.El.Ed) leh Work Education (WE) ah zirlai (candidate) 4406 awmin, zirlai 4419-in an zir chhuak (pass) a. Kum 2020- 2023 chhungin Bachelor of Education (B.Ed) zirlai 191 zinga 186-in an zir chhuak bawk.
DIET Lungleiah hian thawktu 30 (teaching staff 15 leh non-teaching staff 15) an awm. D.El.Ed-ah seat 100 (unit 2) leh B.Ed-ah seat 50 (unit 1) an nei.
DIET Lunglei hian Golden Jubilee pualin budget cheng nuai 11.14 an ruahman a, a remchan dan ang angin sum an tuak. Jubilee pualin kumin kumtir lam khan TNT Home Lungleiah charity ride an buatsaih a, tanpuina sumfai Rs. 15550 leh thawmhnaw leh ei tur engemawzat an hlan. Khawlai tihfai hnatlang tum engemawzat an nei bawk.