Digital arrest hluar hle
Noida a awm doctor hmeichhia chu scamster ten darkar 48 lai ‘digital arrest’-ah bum lutin Rs 59 lakh an laksak a. Hetianga scamster te chetna hi Delhi NCR-ah tun hnai a hluar hle.
Dr Puja Goyal, Noida Sector 77 a cheng chuan July 13 khan call a dawng a. Caller chuan Telephone Regulatory Authority of India official tia inchhalin Goyal hnenah a phone hman mek lai chu porn video thehdarh nana hman mek a ni tiin a hrilh a.
Doctor chuan a awihsak lo zet chungin a hnuah caller chuan hmin theiin video call zawm turin a thlem thlu thei ta a ni. Doctor hmeichhia chu nasa taka vauin digital arrest-in a awm mek thu an hrilh zui a. Darkar 48 zet an thlem leh vau hnuah Goyal chuan 59 lakh chu account an sawiah a transfer ta a ni. Bum a ni tih a hriat hnuah July 22 khan Noida Sector 36 cyber crime cell ah police complaint a siam ta a ni.
Vivek Ranjan Rai, Assistant Commissioner of Police (cyber crime) chuan Goyal in sum a transfer na account details an neih tawh thu sawiin, “Kan hrechiang meka hmalak chhunzawm zel a ni ang,” tiin a sawi.
Tun hnaiah scamster tena mi vau leh bum nana an hman uar tak chu digital arrest a ni. Scamster te chuan an target te chu inah emaw room-ah emaw law enforcement authority anga inchhalin an khung thin a. Law enforcement officer an ni ngeia an ngaih theih nan Fake ID te an siam thin.
A hma lawk pawhin Delhi-a kum 73-a upa ni tawh hmeichhia chu buma awmin Rs 83 lakh an chhuhsak tawh bawk a. Dr. Goyal an bum ang bawkin a phone chu criminal activity tih nana hman a ni tiin darkar 12 chhung vau leh thlemin hun an hmang a ni.
Noida police te chuan mipuite chu hetiang anga inbumna laka fimkhur tura ngenin, “Tun hnaiah hetiang kaihhnawiha inbumna sawm lai thleng tawhin FIR ziahluh te chu chhuizui mek a ni” tiin thurawn an tihchhuahah tarlan a ni.
Police te chuan call an dawn rinhlelhawm deuh te chu finfiah hmasa zel phawt tura ngenin a bik takin WhatsApp emaw video call an dawnin caller credential te check zel turin ngenna an siam bawk a.
“Call-tu in legal action lak emaw personal emaw financial information a dil che u a nih chuan a rang thei ang berin police station maw cyber cell ah hriattir tur a ni,” tiin police te thurawn siam chuan a tarlang.