Digital India leh AI zirho

Mizoram Information & Communication Technology department leh NIELIT Aizawl – Deemed to be University (under distinct category) tangdun chuan Zirtawpni khan NIELIT Aizawl hmun Zuangtuiah Digital India leh artificial intelligence (AI) in India ram a nghawng dan zirhona an buatsaih.
Workshop hi sawrkar laipui Ministry of Electronics and Information Technology (MeitY) in kumin February 19&20-a New Delhi-a a buatsaih tur, ‘IndiaAI Impact Summit 2026’ awm tur atana lo inhmakhuana leh summit buatsaih turah India ram chhunga thalaite leh zirna in tam zawkten an lo hriat a, Digital India leh AI huangah an tel ve theihna atana tih a ni.
MeitY hian AI-in danglamna a thlen theih dan leh chumi chu hmang tangkai a, thlirtu mai niloa, tel ve thei tura thalaite leh zirna in, hnufum bik lo tur leh midang ruala kal a, hmahruaitu ni thei tura zirtirna pek chu a tum a ni.
NIELIT Aizawl director Dr T Gunendra Singh chuan AI-ah an mikhual loa, IndiaAI laboratory changtlung tak neiin, AI lama hmalakna an kalpui mek a, India ram puma NIELIT Centre hrang hrangah AI laboratory din vek a ni tih a sawi a ni.
Workshop hmanpuitu ICT secretary Dr YLN Reddy chuan, India chu khawvel huapa AI lama hmahruaitu ni thei tura hma a laknaah February-a ‘IndiaAI Impact Summit’ New Delhi-a neih tura inbuatsaihna kal zelah he workshop hian India ram hmathlir, a thiltum leh AI atana hmalam hun atan thalaite tichaktu bakah zirnaah AI a tel ve zel theihna atan, sawrkar inrelbawlna kawngah pawh hun lokal zel turah kan inpeih theihna tura hmathlir a ni tih a sawi a ni.
Workshop hawnnaah hian NIELIT Aizawl zirlaite, officer-te leh thawktute bakah Mizoram ICT Department hotute an tel.