Digital technology-ah MRB intuaithar Cyber crime complaint 10700 nei tawh

Mizoram Rural Bank chuan an thawktute chu tunlaia khawvelin a buaipui Anti-Money Laundering and Combating Financing of Terrorism (AML CFT) chungchang Zirtawpni khan an zirtir a. Branch hla zawkten inbiak hmuh theihna hmangin an chhim bawk.
MRB chairman Sheryl L Vanchhong chuan, banking chu digital leh technology hmanga kalpui a nih telh telh avangin cyber fraud, sum tihchingpen, account lem leh online financial crime a tipung tel ve tih a sawi a. Bank-ten financial system humhalh leh customer-te sum humhalh kawngah tan lehzual a ngai a, MRB pawh 2024 June 27 khan National Cyber Crime Reporting Portal-ah onboard a ni tawh tih a sawi a ni.
An inziahluh ve hnu hian MRB chuan cyber-crime complaint 10700 chuang a buaipui tawh a, dik lo taka thil tih a nih lohnan account rinhlelhawm 4242 tihtawp a ni tawh a, ‘lien’ sum inrawlh zawng zawng hi cheng nuai 200 chuang a ni tih a sawi.
Reserve Bank of India general manager Aizawl T Lhungdim pawhin, Mizoram Rural Bank-in AML-CFT pawimawhna hriaa thawktute a zirtir chu lawmawm a tih thu a sawi a. RBI tan pawh technology-a hmasawnna chu banking-a harsatna siamtu a ni ve ta mek, tiin, hetiang veng thei tur hian RBI chuan hmanraw thar a nei ve zel tih a sawi a ni.
AML-CFT Cell assistant general manager Jaipur Seema Agrawal leh chief manager Shailesh Kumar Jha ten an zirtir a. Anti Corruption Bureau addl SP Zarzoliana’n an tawnhriat atanga fimkhur tulna leh an hmalak dan tlangpui a sawi a. Cyber Crime inspector MS Dawngliana’n Mizoram Police-in harsatna an tawh leh mipui atanga harsatna thleng an tawnhriat atangin a zirtir bawk.