Dik lo taka contractor kuta pawisa lut vaibelchhia 1.82

Dik lo taka contractor kuta
pawisa lut vaibelchhia 1.82
Comptroller and Auditor General of India Report No 1 of 2025-a a lan danin, Jal Jeevan Mission hnuaia Kolasib Watson Division-in tui lakna scheme pathum a kalpuinaah, hna thawk zo si lova thawk zo anga ziah avangin cheng vaibelchhe 1.82 (cheng nuai 182) chu dik lo takin contractor kutah a lut.
Tuilakna scheme pathum hi – North Thingdawl Water Supply Scheme, Saihapui ‘K’ Solar Pumping Water Supply leh, Buhchangphai Solar Pumping Water Supply Scheme a ni.
CAG report tarlan dan chuan, North Thingdawl WSS hnuaia hnathawh dan hi account records leh measurement book endik a nih hnuah leh, hnathawhna hmun kalchilha joint physical inspection neih atangin, hna thawk zo si lo, dik lo taka measurement book-a ziah luh angin PHE department chuan pawisa a pe chhuak a ni.
North Thingdawl tuilakna scheme hnuaiah hian electric hmang chi water pump set supply-na turah tender amount chu cheng nuai 68.04 niin, ni 60 chhunga thawh zawh tur a ni. Supply order terms and conditions ang chuan, order hmuh hunah 50% payment pek a ni anga, bungrua (water pump set) a hmuna phurh thlen hunah 40%; a bak 10% chu hnathawh zawha a nihna tur anga hman theih (commissioning) a nih hnuah pek leh tur, tih a ni.
Hnathawh dan chhinchhiahna measurement book-a a lan danin, hna hi February ni 16, 2022-a thawh tan a ni a, March 29-ah zawh a ni. Payment pawh contractor hnenah 2022 March 30 khan cheng nuai 61.24 (90% of contract amount) pek a ni.
Hemi hnu, January ni 21, 2023 khan joint physical verification chu department official-te nen neih a ni a, chutah chuan electric hmang chi water pump set chu bun (install) a ni lo tih hmuh chhuah a ni a, water pump set hi a hmunah phurh thlen a ni ngei em tih finfiahna a awm lo.
March ni 30, 2022-a payment cheng nuai 61.24 (90%) pekah hian 40% hlut zawng cheng nuai 27.22 hi dik lo taka contractor kuta lut a tih theih ta a ni.
CAG report-a tarlanah hian, measurement book lama record awm si, a taka hmuh tur awm si lo ang hi cheng nuai 182 hu a awm a; chu’ngte chu – North Thingdawl WSS hnuaiah cheng nuai 44.82; Saihapui ‘K’ Solar Pumping WSS-ah nuai 21.48 leh Buhchangphai Solar Pumping WSS-ah nuai 1.16 a ni.