Dinthar FC in MPFC an hneh

September ni 9, Thawhlehni khan Mizoram tualchhunga football club te inelna ngaihhlut hlawh ber Mizoram Premier League (MPL 12) chu RG Stadium-ah khelh chhunzawm a ni a, Pathuamnaa awm mek Dinthar FC chuan Mizoram Police FC an hneh a, pathumna an luah chhunzawm. Dinthar FC an chak rual hian table hnuai lama awm Saikhamakawn FC in hnehna an chang a, hma an sawn dawrh.
Pathuamnaa awm mek Dinthar FC hian season liam taa final lut Mizoram Police FC an hmachhawn. Panganaa awm mek MPFC lakah an vannei a, panalty vawi hnih ngawt an hmu. Penalty vawi hnih an hmuh an chhwar tangkai a, pathumna luah chhunzawm turin 3-1 in hnehna an chang a, point thum hlu tak an hmu.
Tualchhung football a hnuhma nei tha tak Dinthar tan hian player of the match a thlan zui tak MS Dawngliana chuan minute 32-naah penalty atangin hmahruaina goal a thun. Penalty atangin hmahruaina goal thun bawk mah se an goal an venghim thei bik lova, chawlhlawk hmain goal an chhuah. MPFC tan hian Lalfakzuala chuan minute 45_1-ah goal thuin an si phurh a sut a, 1-1 a inhnehtawk chungin chawlhlawk an hmang.
Chawlhlawk hnu lamah Dinthar FC an khel tha chhunzawm a, goal hnih an thun belh leh. Minute 55-na lekah Lalrintluanga chuan hma an hruai nawn lehna goal a thun. Lalrintluanga goal thun hnu lawkah DFC hian penalty an hlawhchhuak zui leh. Penalty an hmuh hi Lalchhanchhuaha chuan minute 61-naah harsatna tawk lovin a pet goal a, an hmahruaina a tizau. Chhanchhuaha goal thun hnu hian inkhel hmuhnawm zui viau mah se goal dang a luh belh thei lova, Dinthar FC in 3-1 in hnehna an chang zui ta a ni.
Mizoram Police FC lakah hnehna an chan vangin Dinthar FC hian khelh nga atangin point 10 an hmu a, pahnihna an luah chhunzawm. Dinthar FC chungah hian khelh nga atanga point 13 hmu Aizawl FC leh Chanmari FC te an awm. Dinthar lakah an chak zawh loh vangin MPFC in hma an sawn thei rih lo.
Thawhlehnia inkhel dangah table hnuaia awm pahnih; Saikhamakawn FC (SKKFC) leh Sport & Youth Services FC (SYS FC) te an inhmachhawn a, SKKFC in 2-1 in hnehna an chang a, SYS kalsanin panganaah an inhlangkai. Saikhamakawn in hma an sawn laiin SYS in table hnuai an luah nghet ve thung.
MPL season kal meka chak la nei lo SYS hian an chungchiaha awm Saikhamakawn FC lakah bul an tan tha a, inkhel tan atanga minute 10-na lekah Stephen C Malsawmtluanga chuan hmahruaina a goal a thun. Goal thun hmasa zawka an tan vangin phur viau mah se an phur rei lova, chawlhlawk hmain hnufual zawkah an tang hman.
Goal an chhuah hnuin SKKFC an insiamtha a, an si phurh sut tumin tan an khawh nasa hle. Na taka an khingpuite an nawr rah an seng a, minute 30-naah Francis Malsawmkima chuan goal thunin an si phurh a sut. An si phurh an sut vangin an phur viau a, an khingpuite an nawr zi viau bawk. Goal an thun atanga minute 9-na chiahah khel tha bera thlan zui tak Kiran Chhetri chuan hma an hruai letna goal a thun a. Chhetri goal thun hi hun tawp thlengin an venghim a, point thum hmuh nan an hmang.
SYS laka point thum an hmuh vangin Saikhamakawn FC in khelh nga atangin point nga an hmu a, panganaah an inhlangkai. An chungchiaha awm Kanan FC nen point khat lekin an inthlau a, hmachhawn chho zel turin hun tha an nei a. Phur takin hma lam an pan zui ang.