District 60% dawnah khaw lum uchuak thleng thei
India-a district 60% dawn, mi cheng hmun lia thena hmun hnih zet awmnate chuan zir chianna neihah khaw lum uchuak tak ‘tuar thei leh tuar ngei tur’ dinhmunah an awm tih tar lan a ni a. Zan lamah khaw lum leh boruak uap nasain hriselna pawh a khawih theih niin an sawi.
New Delhi-a Council on Energy, Environment and Water (CEEW) think tank-in sik leh sa, hriselna leh infrastructure data an lak khawm atanga khaw lum uchuak awm theihna hmun an chhut chhuah hi Thawhlehni khan tihchhuah a ni.
“Indian district 57% chuang, India-a mihring cheng 76% vel awmnate hi khaw lum uchuak tak thleng mai thei leh thlen ngeina tur hmun a ni,” an ti a. Ram khawpui ber, New Delhi chu a thlen ngei a rinawm zualna em em zingah a tel bawk tih an tar lang.
Zir chianna tihchhuah a nih mek lai hian India hmar lamte chu khaw lum leh lum uchuak takin a tuam vel lai a ni mek a. Asia chhim lam rama chengte hian kum tin khaw lum hret hret zel an tuar mek a, scientist-te chuan heng a thlen chhan hi mihring khawsak danin a hrin chhuah sik leh sa inthlak nasa vang niin an sawi.
CEEW-in an zir chiannaah hian India hmar lamte chu boruak uap tak a awm nasa thei niin an sawi bawk a, heng zingah hian ram ro zualna lai pawh a tel a. Boruak a uap nasat hian mihring taksain thlan a pek chhuah a muang a, khua lum mah se taksain lum a pe chhuak harsa bik thin a ni.
India-ah hian nikum March 1 leh June 18 inkar khan heatstroke 40,000 an awm tih chhinchhiah niin khaw lum lutuk avanga thi hi mi 110 vel an awm bawk a. Hmarthlang leh khawchhak lamten a nih dan thin leta tam khaw lum uchuak ni an tawng a ni.
India-ah hian a nih dan thin pangngaiah chuan April thla chawhnu lam atanga June thla tir lam thlengin nipui vanglai a ni a. June atang hian hmun thenkhatah chuan ruahtui tlain fur a intan tawh a, September thla tawp thleng hi fur tia sawi thin a ni.
District 60% dawnah khaw lum uchuak thleng thei
Get real time updates directly on you device, subscribe now.