District dangah ASF kangkai rih lo

African Swine Fever (ASF) a leng mek a, mahse a darhzau vak rih lo. District pali-ah finfiah a ni tawh a, district dang a kangkai rih lo.
AH&Vety department chhinchhiah danin, April ni 5-ah Lunglei district an lang a, tihian district pali-ah finfiah a ni. Chumi hnuah district dang an lang rih lo.
Mamit district-ah finfiah a ni phawt a, chumi zawhah Lawngtlai district-ah finfiah niin, Siaha district-ah finfiah a ni leh a, Lunglei district-ah finfiah a ni leh. April ni 5 thlengin heng district pali-ah finfiah a ni a, June ni 18 thlengin district dang a kangkai lo.
‘Vawk vulhtute leh a talhtute an fimkhur vang te a ni a, tin, ASF hi kan chenpui thiam tawh tihna te pawh a ni ang,’ tiin AH&Vety department lam chuan an sawi.
District dangah pawh rinhlelh hi chu a awm ve deuh reng a, sample endik pawh a awm deuh reng a, mahse vanneihthlak takin ASF a ni lo zel rih tih an sawi.
Kuminah ASF hi leng mah se kum hmasate ngaihtuah chuan a nasa rih lo an ti a, kum dangah chuan June leh July vel hi a vanglai a nih thin thu, kuminah chuan June-ah pawh kum hmasa June te ngaihtuahin hri hi a nasa lo an ti. June ni 18-ah pawh vawk thi zat hi pali a ni a, kum dang June nena khaikhinin a tam lo an ti. Vawk suat tur a awm lo bawk.
Kumina ASF finfiahna hmasa Mamit district-ah hun engemaw chen chu ASF vangin vawk a thi tawh lo a, finfiahna hnuhnung ber Lunglei district-ah pawh hian a tir lam deuhva thi bak report a awm zui rei lo.
Kuminah March ni 20-ah ASF hi hriat tan a ni a, AH&Vety department chhinchhiah danin, June ni 18 thlengin vawk 4875 a thi tawh a, vawk 1600 tihhlum/suat (cull) a ni tawh.