District Hqrs. hrang hrangah Green Mizoram Day hmang

District Hqrs. hrang hrangah
Green Mizoram Day hmang
June 11 kha Green Mizoram Day 2025 a ni a, district headquarters tinah he ni denchhen hian hman a ni a. A hmanna pui ber chu Thenzawlah hman niin, hei hi Serchhip district-a hmanna a ni nghal.
Aizawl district pualin 34 Assam Rifles Complex Zokhawsangah hman a ni a. Hmanpuitu MLA Baryl Vanneihsangi chuan, a kum telin tui kan harsa tulh tulh a, a thlawna kan dawn ruahtui khawlah tan lak nasat a ngai, tiin, ruahtui khawlna tha ber chu ramngaw a ni tih a sawi.
“Kan ramngaw neihsa hi tihchereu loin humhalh tha ila, thing phun belh uar zel ang u. Kan thing phunna hmun erawh thlang thiam ila, leimin thlentu leh electric hrui tana hnawksak a ni thei dawn em, tih ngaituah chungin thing phunna hmun tur thlang uluk ang u,” a ti. Thing phun tawh enkawl zui kawngah tan la zual turin a sawm a ni.
Report-a a lan danin, kum 1999 atanga kum 2024 (kum 26 chhung) hian Green Mizoram Day pualin thingtiak 2908706 semchhuah tawh niin, 1771632 phun tawh a ni.
District tinah kangmei ven kawnga titha khua pathum thlanchhuah an ni a, pakhatna in sumfai Rs. 50000, pahnihna Rs. 30000, pathumna Rs. 20000 a keng.
Kangmei ven lama titha khua pathum
leh district tina kumina thing phunna
# Aizawl district-ah 1-na N Serzawl, 2-na Thiak, 3-na Lungsum a ni. Zokhawsangah thing tiak 1000 vel phun a ni.
# Champhai district-ah 1-na Dungtlang, 2-na Dilkawn, 3-na Zawlsei. Mualbuhvum atanga Zote, Khankawn – Zotlang, Ruantlang – Mualkawi, Mualkawi – Melbuk leh Melbuk – Zokhawthar inkarah thing tiak 1643 an phun.
# Serchhip district-ah 1-na Leng, 2-na Zote South, 3-na Ngentiang. Thenzawl Golf Course-ah thing tiak phun a ni.
# Khawzawl district-ah 1-na Kawlkulh North, 2-na Chalrang, 3-na Lungtan. NH-06 kawn Khawzawl to Aizawl Road, Choak buk velah thing 240 an phun.
# Saitual district-ah 1-na NE Tlangnuam, 2-na ?Vanbawng, 3-na ?Ruallung. Tlaizawng tiak 1000 an phun.
# Mamit district-ah 1-na Rawpuichhip, 2-na Saithah, 3-na Chungtlang. Vaisam Park-ah thing tiak an phun a. Kum 1999 atanga kumin thlengin an district-ah he ni denchhen hian thing tiak 119225 phun a ni tawh.
# Kolasib district-ah 1-na Khamrang, 2-na Khuangpuilam, 3-na Bilkhawthlir South. JNV Thingdawlah thing phun a ni.
# Lawngtlai district-ah 1-na Thaltlang, 2-na Ngengpuikai, 3-na Sangau-II. NH 02 – Saikah ‘L’ leh Chawntlangpui inkar kawng dungah thing tiak 390 an phun.
# Siaha district-ah 1-na New Laty, 2-na Chhaolo, 3-na Amobyu ‘B’. Tisopi Road, Tipi Ferry Road leh SDFA ground-ah thing tiak an phun.
# Lunglei district-ah 1-na Lungsen-I, 2-na Mualcheng South, 3-na Mualthuam North. Lunglei tui lakna hnar, Pukpui ram chhung Tlawng leh Pialthleng panna kawngpui sirah thing tiak 1200 vel an phun.
# Hnahthialah Vawkpuilutar leh Thiltlang inkarah thing tiak phun a ni.