District Jail sakthat dan tur en

District Jail sakthat dan tur en
Lunglei West bialtu MLA Pu T. Lalhlimpuia chuan Thawhlehni khan Lunglei District Jail tlawhin, SASCI (Scheme for Special Assistance to States for Capital Investment) sum hmanga District Jail sak dan tur ruahmanna a hmunah a enfiah.
Lunglei West bialtu MLA hi Lunglei Municipal Council (LMC) Ward No.V councillor Zonunmawii leh Lunglei SP J Lalmuankima ten tawiawmin, District Jail-a thawktuten an lo dawngsawng a. Jail hmunhma fangkualin, thawktuten District Jail mamawh hrang hrang an lo thlen chu ngaihthlak sakin, a theih anga an mamawh ngaihtuahpui a tum thu a sawi.
District Jail-a duty Mizoram Home Guard Civil Defence barrack chhe tawh tak sakthat dan tur pawh T Lalhlimpuia hian a enpui a. SASCI suma Lunglei District Jail sakthat dan turah ruahmanna (estimate) ang thlap leh mamawh phuhru zo ngei tura tha taka hna thawh chu sawrkarin a duh ber a ni, tin, hna tha chiah an beisei tih a sawi.
Tunah hian Lunglei District Jail-ah tang hmeichhia 15 leh mipa 105 an awm a. Thawktu, guiding staff mipa 18 leh hmeichhia 9 an awm a ni.