District MJA inkhawmpui hmang

Mizoram Journalists’ Association Lunglei leh Serchhip District chuan Thawhlehni khan annual conference an hmang.
MJA Lunglei District hian Lunglei Press Club-ah hmangin minister Lalrinpuii’n a hmanpui a. A thusawi zingah, sawrkarin Eng anga ruahmanna tha pawh siam mah se, mipui thlawpna tel lo chuan a hlawhtling thei dawn lo a, chanchinbumite chu mipui hnenah a tul ang an hriat tur hrilhhriat pui a, tanpui turin a sawm. Chanchinbumite nen thawhhona tha tak neih zel a duh tih a sawi bawk.
MJA Lunglei hian hruaitu thar thlang nghalin president ni lai Laltlanthanga, Hlimthla editor chu president atan thlan nawn a ni.
MJA Serchhip District hian Serchhip Press Club-ah conference an hmang a. District bawrhsap David Lalthantluanga’n a hmanpui. Kum 2024-2026 chhunga MJA Serchhip District hruaitu tur thlan a, president nilai C Lalhminghlua chu president atan thlan nawn a ni. Tun dinhmunah Serchhip district-ah MJA member 14 an awm a, Serchhipah tualchhung nitin chanchinbu 7 tichhuakin, Thenzawlah chanchinbu 3 tihchhuah a ni.