District pahnihah Hep ‘C’ vei awm lo turin bei dawn

Ruihhloa inchiu thin ‘people who inject drugs (PWIDs)’ te zinga Hepatitis C (HCV) dinhmun hriatna leh a veite enkawlna tur project, Mizoram district zinga HCV hmuhchhuah tamna pahnih – Aizawl leh Champhaia tan tur project ‘Uniting for a Hepatitis-C Free Mizoram’ chu Ningani khan Health & Family Welfare minister Dr R Lalthangliana’n a hawng.
Health minister chuan hepatitis hrang hrang zingah Hepatitis C chu Mizorama hmuhchhuah tam bik a ni, tiin, Hepatitis C hi a hri danna awm loh bakah a inenkawlna man a sang a. District pahnih tan hetiang project ruahman a ni chu lawmawm a tih thu a sawi.
He project hnuaiah hian Aizawl leh Champhai district-a ruihhloa inchiu thin PWIDs chu an HCV dinhmun endik vek an ni dawn a, test-a positive-te tana nemghehna – confirmatory test an tih sak leh anga, chumi atanga HCV vei hmuhchhuahte chu enkawlna pek an ni dawn a ni. He project bultumtu hi khawvel huapa natna hri hmuhchhuahna, diagnostics lamah thawktu pawl FIND leh damdawi company Roche an ni a; an ni hian MSACS leh National Health Mission hnuaia National Viral Hepatitis Control Programme an thawhpui dawn. He project hi nakum August thleng kalpui tum a ni.
Project chungchang hi FIND project lead Dr Kanudeep Kaur chuan a sawihawng a; Health (DHME) deputy director Dr Ruth Lalmuanpuii’n Mizoram HVC dinhmun a sawi a. MSACS project director Dr Lalthlengliani leh NHM mission director Dr Eric Zomawia ten he ruahmanna hnuaia hmalak dan tur an sawi a ni.