Djokovic a chak laiin Tsitsipas a tla

Tennis a inelna lian Grand Slam pali zinga ngaihhlut hlawh ber Wimbledon 2024 khelh chhunzawm zel a ni a, ningani khan Novak Djokovic-a’n hnehna a chang. Djokovic a chak lai hian mipa lama player langsar zinga mi Stefanos Tsitsipas leh Hubert Hurkacz te third round lut zo lovin an tla thung.
Wimbledon-a vawi sarih champion tawh Novak Djokovic hian second round ah tualchhung tlangval Jacob Fearnley a hmachhawn a, set khat hloh chungin hnehna a chang. Wimbledon-ah a vawi riat nana champion tuma tan khawh Djokovic hian amah hlau lo tak Fearnley lakah tha takin bul a tan a, break a neih chhawr tangkaiin set khatna chu harsa lo takin a la.
Set hnihnaah inhnehtawk hret mah se Nole hian break neiin set a la zui leh. Set hnih a hloh zawn hnuin Centre Court a tan hlawh tak Fearnley chuan huai takin Djokovic a bei let a, tie-break-ah chungnung zawkin set a la ta mai a, mipui au thawm pawh a ring hle. Set a lak vangin beiseina thar nei bawk mah se set linaah uiawm takin a serve a hum zo lo va, Grand Slam a vawi 24 zet champion tawh Novak Djokovic hian 6-3 6-4 5-7 7-5 in hnehna a chang a, third round a inhlangkai zui ta a ni.
Djokovic a chak lai hian eleventh seed Stefanos Tsitsipas leh seventh seed Hubert Hurkacz te erawh chu second round paltlang zo lovin an tla thung.
Grand Slam final vawi hnih lo khel tawh Greek tlangval Tsitsipas hian world number 88 Emil Ruusuvuori a hmachhawn a, awlsam taka chak tura ngaih ni bawk mah se a mualpho. Ruusuvuori nen hian inhnehtawk takin bul an tan a, set khatna leh sete hnihnaah tie-break khelh a ngai nghal ve ve a, rinkai lo zawk Ruusuvuori a chungnung ve ve. Set hnih a hloh zawn hnuin Tsitsipas a insiamtha a, set thumnaah break a neih chhawr tangkaiin set a la. Set khat a lak hnuin a khingpui lehthal theih beiseina thar nei bawk mah se a tlo zo chuang lo va, set hloh zui lehin Ruusuvuori hian inlehthalna lian a thlentir a, 7-6 (8-6) 7-6 (12-10) 3-6 6-3 a hnehna changi Tsitsipas a vaw tla.
Ningani zana inkhel dangah Hubert Hurkacz pawh Arthur Fils hneh lovin a tla ve ringawt bawk. Fils leh Hurkacz te hian inkhel hmuhnawm tak an lantir a, rinkai lo zawk Fils hian 7-6 (7-2) 6-4 2-6 6-6 (9-8) in hnehna a chang nawlh a, Tomas Machac hmachhawn turin third round a lut. Kum 20 mi Fils hi kum 2014 a Nick Kyrgios-a’n Rafael Nadal a hneh nawlh hnua top 10 player hneh leh thei naupang ber a ni.