Djokovic a chak leh ta

Ningani khan Australian Open 2026 a ni lina khelh a ni a, mipa lamah veteran player pathum; Novak Djokovic, Stan Wawrinka leh Marin Cilic ten hnehna changin third round an lut hlawm.
Australian Open-ah vawi 10 champion tawh Novak Djokovic chuan ningani khan second round-ah Francesco Maestrelli a hmachhawn a, set hloh lovin a chak. Grand Slam-ah vawi 25 champion tlin tuma tan khawh Djokovic hian a khingpui hi a ngam viau a, 6-3 6-2 6-2 a sawpin third round a inhlangkai.
Awlsam taka Djokovic a chak lai hian Grand Slam champion hlui Stan Wawrinka erawh chuan French qualifier Arthur Gea lakah harsa takin hnehna a chang ve thung.
Wawrinka leh Gea te hi an inhnehtawk viau a, deciding set-ah pawh tie-break khelh a ngai hial. Set hnih hloh hmasa zawkah tanga, dinhmun derthawng taka ding hman Wawrinka hi tie-break-ah 10-3 ngawtin a chungnung a, a khingpui lakah hian 4-6 6-3 3-6 7-5 7-6 (10-3) a hnehna chang hramin third round a lut thei hram.
Djokovic leh Wawrinka te rual hian veteran player zinga mi Marin Cilic pawhin hnehna a chang a, ani hi chu a chak awlsam viau thung.
Cilic hian Canadian Shapovalov a hmachhawn a, darkar hnih chhung lekin a khingpui hi 6-4 6-3 6-2 in a hneh hman.
Ningani vek hian champion lai Jannik Sinner pawhin hnehna a chang ve bawk.