Djokovic a chak

Clay Court a Grand Slam khelhna awmchhun French Open 2023 chu May 28, Pathianni khan khelh tan a ni a. Mipa lamah champion tura rinkai Novak Djokovic chuan set hloh lova hnehna changin second round a lut.
Grand Slam-ah vawi 22 champion tawh Djokovic hian thawhtan zan khan Aleksandar Kovacevic a hmachhawn a, harsatna lian tawk lovin hnehne a chang. French Open-ah vawi hnih champion tawh Djokovic hian No. 114-na Aleksandar Kovacevic lakah a khel tha viau a, awlsam takin set hmasa pahnih a la. Set thumnaa tie-break khelh ngai bawk mahse Serb hian tie-break-ah 7-1 ngawtin hnehna a chang zui ta tho a, 6-3 6-2 7-6 (7-1) a hnehna changin second round a lut. Second round-ah hian Marton Fucsovics a hmachhawn zui leh ang.
French Open 2023-ah ‘Clay Court lalpa’ an tih hial Rafael Nadal a inlan theih loh vangin Novak Djokovic-a’n ngaihven a hlawh leh zual. French Open 2023-ah hian a champion thei a nih chuan Djokovic hi Grand Slam-ah vawi 23 a champion tling chiah dawn a, mipa lamah Grand Slam-a champion tam ber record thar a siam ang. Player ngaihven hlawh, mimit fukna ni mah se Djokovic hi tunhnaiah a khel tha lo viau a, champion tura rinkai ber Carlos Alcaraz nen semi-final-a inhmachhawn thei an nih vangin Djokovic tan hian Roland Garros-a champion a harsa hle tura ngaih a ni.
Thawhtan zan vek khan champion tura rinkai ber Carlo Alcaraz chuan awlsam takin hnehna a chang ve bawk. World No. 1 Alcaraz hian a khingpui Flavio Cobolli chu 6-0 6-2 7-5 in a sawp aw, awlsam takin second round a lut.
Mipa lam chak langsar zingah British mipa no. 1 Cameron Norrie a tel a. Tla thei dinhmun derthawng taka a ding laiin Norrie hian a khingpui Benoit Paire a lehthal thei hram a, inkhel hmuhnawm takah 7-5, 4-6, 3-6, 6-1, 6-4 a hnehna changin second round a lut.
French Open 2023-ah hian mipa lamah inlehthalna lian a la thleng lova, hmeichhe lama tla langsar zingah Pliskova a tel tawh thung.
French Open 2023 hi May 28, Pathianniah khelh tan a ni a. June ni 11, Pathianni zanah zo fel tura ruahman a ni. French Open 2023-ah hian a vawi khat nan computer hmangin line endik tan a ni a, linesman-ah mihring an tan tawh loh vangin inhnialna tam tak a bo tura ngaih niin, game a rei lo deuh zawk tura beisei a ni bawk.