French Open 2024 khelh mekah Novak Djokovic chuan hliam vangin quarter-final a hmachhawn thei lova, a inhnukdawk. Djokovic-a’n semi-final a luh phak loh vangin ATP Ranking chhuak tharah Jannik Sinner chu a vawi khat nan World No. 1 a ni dawn.
World No. 1 ni lai leh French Open champion lai ni bawk Djokovic hian thawhtan zan khan harsa takin Francisco Cerundolo a hneh a, quarter-final a lut. Francisco Cerundolo nen an inhmachhawn tum hian a khup a tihliam a, match kal mekah pawh a khup hliam hi enkawl a ngai. A khel chhunzawm thei dawn lo emaw tih hnuah harsa ti takin a khingpui a hmachhawn zui a, amawh ngei pawhin mak a tih turin hnehna a chang zui a, quarter-final a lut.
Cerundolo lakah harsa taka hnehna a chan hnuin a hliam hi uluk zawkin endik a ni a, quarter-final a hmachhawn thei ta lo. Harsa taka hnehna a chan vangin Serbian pa huaisen Djokovic hian Grand Slam vawi 370 chak in, Grand Slam a chak hnem ber record thar a siam hman chiah chiah a. World No. 1 ni chhun zawm tura a mamawh semi-final luh erawh a puitling thei ta lo. Tennis player ropui bera ngaih niin, Grand Slam ah vawi 24 zet champion tawh mah se Djokovic hi Olympic ah a la champion lo va. Kum 2024 chhung a tum lian ber chu Olympic a champion a ni tih hi a zep hran lo. French Open atangin inhnuk dawk mah se Wimbledon leh Olympic a hmachhawn zui thei tura ngaih a ni.
Djokovic a inhnuhdawh tak vangin 2022 leh 2023 finalist Casper Ruud chuan awlsam takin semi-final a lut. Djokovic-a’n semi-final a luh phak loh vangin Australian Open champion Jannik Sinner chu World No, 1 thar a ni dawn a. French Open zawh rualin ranking thar tihchhuah a ni ang a, karleh thawhtanni atangin sinner hi No. 1 a ni tan ang. Kum 22 mi Sinner hi Italian mipa zingah Grand Slam-a champion hmasa ber a lo ni tawh a. ATP No. 1 ni thei hmasa ber a ni zui leh dawn bawk.
Djokovic a inhnukdawk
Get real time updates directly on you device, subscribe now.
Next Post