Djokovic a la chuai lo

Thawhlehni khan Australian Open mipa quarter-final khelh a ni a. Inkhel ngaihven hlawh takah Novak Djokovic chuan Carlos Alcaraz a hneh a, semi-final a lut. Djokovic hian semi-final ah Alexander Zverev a hmachhawn zui leh ang.
Quarter-final ah Novak Djokovic leh Carlos Alcaraz te inkhel hian ngaihven a hlawh hle a, a hmuna entu pawh an thahnem hle. Australian Open hi Djokovic ropuina hmun ni bawk mah se thahrui ngah leh zuanzang tak Alcaraz lakah chak turin rin a kai zo chuang lo. Wimbledon final-ah vawi hnih a hneh loh zawn tawh Alcaraz lakah a tlawmin, Grand Slam ah vawi 25 champion a tumna a tlawlh leh rih tura ngaihna lian tak a awm. Mah se, Djokovic chu Djokovic a ni a, quarter-final a hnehna changtu chu Djokovic leh tho a ni.
Djokovic leh Alcaraz te hian inkhel hmuhnawm an lantir a, an inhnehtawk nghal hle. Set khatnaah game li ve ve an lak hnuin Djokovic-a’n a serve a hum zo lo. Break pawimawh tak a neih vangin Alcaraz chuan set a la hmasa.
Set khatna a hloh hnuin Djokovic a insiamtha nghal thuai a, set hnihnaah bul a tan tha viau set tir lamah 3-0 i hma a hruai hman. 3-0 laiin hmahruai tawh mah se a serve a hum zo lo leh a, Alcaraz-a’n 4-4 in a nihrual leh hman. 4-4 a nih lai hian Djokovic chuan break pawimawh tak a nei ve leh ta mai a, a serve hum zuiin set a la ve leh ta a, 1-1 a ni.
Set khat ve ve an lak hnuin inkhel a hmuhnawm zui viau a, hun pawimawh leh boruak sanga chetha thin Djokovic chuan a zia a chhuah a, inkhel thununtu zawkah a tang chho deuh ta char char. Set thumnaah inkhel tawk chho viau mah se hun pawimawhah che fuh ngun zawk leh tawnhriat ngah zawk Djokovic chuan break a neih nawn a chhawr tangkai a, game thum hloh chugin set a la zui leh a, 2-1 in hma a hruai let.
2-1 a hma a hruai hnuin Djokovic a khel tha chhunzawm a, set lina tirah Alcaraz serve a break zui leh nghal a, a serve a hum zui leh bawk vangin 2-0 in hma a hruai. Alcaraz hian break let ngei tumin tan khawh nasa hle mah se break a nei thei tawh lo. Djokovic pawhin break nawn leh theihna remchang nei bawk mah se break a nei nawn thei tawh bik lo. Harsa taka a serve a hum hram hram hnuin Djokovic hian inkhel hmuhnawm leh inkhel harsa zetah khingpui hautak tak Alcaraz lakah 4-6, 6-4, 6-3, 6-4 in hnehna a chang a, semi-final a inhlangkai.
Grand Slam-ah vawi 24 zet champion tawh Novak Djokovic hi player lar thar, player taima, thahrui ngah leh thiam zet mai Carlos Alcaraz-a’n a rawn ngam chho dawn viau a. Wimbledon Final-ah vawi hnih hneh zawn hman mah se player ropui danglam bik Djokovic hi a tlawmna ngaiah a tlawm nawn duh zen zen lo. Alcaraz hi inkhel pawimawh zet Olympic final-ah a hneh hnui Australian Open-ah a hneh zui leh ta bawk a. Alcaraz lakah hian 5-3 in hma a hruai fal ta zui ta nghe nghe a ni.
Djokovic hian semi-final-ah fiahna hautak a hmachhawn zui leh dawn a, second seed Alexander Zverev a hmachhawn zui leh dawn. German player langsar Zverev hian quarter-final-a a khingpui Tommy Paul lakah harsa tak; 7-6 (7-1, 7-6 (7-0), 2-6, 6-1 in hnehna a chang a, Australian Open-ah a kum zawnin semi-final a lut.
Semi-final-a inhmachhawn tur Novak Djokovic leh Alexander Zverev te hi inelna hrang hrangah vawi 12 an inhmachhawn tawh a, Djokovic hian 8-4 in hma a hruai mek. An intum hnuhnun ber ATP Masters 1000 Cincinnati Semifinal-ah Djokovic hian set hloh lovin hnehna a chang. Australian Open a nih miau vangin Djokovic hian final lut turin rin a kai zawk ang