Djokovic hmaa ding tur Alcaraz

Melbourne Park-a khelh mek Australian Open 2025 hmawr bawk a hnai hret hret a, quarter-final-a inhmachhawn tur a hriat tan tawh. Pathianni khan mipa lama player langsar pahnih; Novak Djokovic leh Carlos Alcaraz ten quarter-final-a inhmachhawn turin hnehna an chang ve ve. Quarter-final-ah Djokovic leh Alcaraz te inhmachhawn tur hian ngaihven a hlawh hle.
Australian Open-ah vawi 10 zet champion tawh a, Grand Slam-a champion tam ber ni bawk Novak Djokovic hian Pathianni khan fourth round-ah Jiri Lehecka a hmachhawn. Nole hian Lehecka lakah set hloh lovin hnehna a chang a, awlsam pangngai takin quarter-final a lut. Grand Slam-ah vawi 25 champion tuma tan khawh mek Djokovic hian Lechecka lakah bul a tan tha a, set khatnaah game thum hloh chungin set a la.
Set hma ber a lak hnuin set hnihnaah a khingpui a khel tha hret naa break vawi khat a neih a chhawr tangkai a, set a la nawn leh. Inkhel a rei telh telh a, Lehecka a khelh tha tulh tulh. Set thumna tir lamah an serve hum zo lo ve ve mah se break an nei let ve ve a, chumi hnuah break nei thei an awm tawh lo. Inhnehtawk taka game an inlakchhawk zak zak hnuin tie-break khelh a ni a, tie-break-ah Djokovic a chungnung zui leh a, 6-3 6-4 7-6 (7-4) in a chak zui ta a ni.
Pathianni chawhma lam khan champion tura rinkai zinga mi Carlos Alcaraz chuan British No. 1 Jack Draper a hneh a, quarter-final a inhlangkai.
Alcaraz leh Draper te hian inhnehtawk takin bul an tan a, inkhel hmuhnawm an lantir. Set khatnaah harsa takin Alcaraz a chungnung thei hram a, game nga hloh chungin set a la. Set hnihna atangin Draper hi khaw lum lutukin a tibuai a, thothang tha takin a inlan thei tawh lo. Set hnihnaah hian Alcaraz chuan awlsam takin set a la. Set hnih a hloh zawn hnuin Draper hian khelh chhunzawm zel a zuam lo va, a inhnukdawk zui a, Alcaraz hian 7-5, 6-1 in hnehna a chang ta a ni.
Djokovic vs Alcaraz
Quarter-final a inhmachhawn tur Novak Djokovic leh Carlos Alcaraz te hi tunlai a player tha ber ber zing a mi an ni a, an inhmachhawn tawhah an inhnehtawk thei viau bawk nen an inhmachhawn tur hian ngaihven a hlawh hle. Anni pahnih hi vawi sarih an inhmachhawn tawh a, vawi khatin Djokovic a chak tam zawk hret a, 4-3 in hma a hruai mek. 2024 chhung khan vawi hnih an inhmachhawn a, vawi khat ve ve an chak. Wimbledon final-ah Alcaraz-a’n set hloh lovin hnehna a chang a. Olympic final-ah set hloh lovin Djokovic a chak ve thung. Quarter-final-ah hian Alcaraz a chak a nih chuan 4-4 in an in draw chiah ang.
Tarlan tawhain Djokovic leh Alcaraz te hi an intum tawk thei viau a, Australian Open hi Djokovic khelh thiamna hmun a nih vangin Alcaraz tan harsatna a thlen thei tura ngaih a ni. Alacaraz chuan a khingpui tur Djokovic chu naupang tha leh ang maia zuanzang a nih thu a sawi a sawi a. Chona lian hmachhawn tura a inpeih thu a sawi tel bawk. Djokovic leh Alcaraz te hi thawhlehni-ah an inhmachhawn ang.